Ramadani: Ndaj Polonisë futemi për fitore

Mesfushori i Kombëtares së Shqipërisë, Ylber Ramadani ka dalë në konferencën për shtyp në krah të Sylvinho në prag të ndeshjes me Poloninë që zhvillohet nesër në orën 20:45 në stadiumin “Air Albania”.

Ai e ka vlerësuar lart përballjen e së dielës.

“Ky është vetëm fillimi për mua, duhet të punoj shumë, dua të arrij atje ku unë kam synimin. Me Çekinë u futëm për të fituar, atmosfera nuk është se nuk ishte e lumtur pas ndeshjes. Ne jemi profesionistë, gjithmonë në ndeshje ka presion, ne trajneri na ka përgatitur shumë mirë, është një ndeshje që duhet të futemi për ta fituar. Kemi edhe tre të tjera, nuk është se e kemi vetëm nesër, duhet të qëndrojmë me këmbë në tokë, nuk duhet ta na kapë euforia por ta fitojmë duelin. Ne çdo ndeshje do futemi për të bërë presion dhe për të fituar, se e dimë se çfarë objektivi kemi dhe do të bëjmë presion. Atmosfera në skuadër është shumë e mirë, dhe ka qenë më e mirë që kur kam qenë këtu. Jemi përgatitur dhe do të përgatitemi më mirë për të marrë një rezultat pozitiv”, deklaroi ai.