Fadil Rama i lumtur pas fitores së parë të Drenicës, tregon objektivin kundër Feronikelit

Drenica nuk e nisi mirë kampionatin kur pësoi humbje nga Prishtina në kryeqytet, por sot sikur është kthyer buzëqeshja te kjo skuadër pasi me përmbysje e mposhti Besën me rezultat 2:1.

Trajneri i kuqezinjve, Fadil Rama për “Art Sport” u shpreh i lumtur me fitoren.

“Përsëri i kemi përsëritur gabimet e bëra në ndeshjen e kaluar. Sot e fituam ndeshjen me shumë mund por me meritë. Gjithsesi, me këtë format të garave të gjitha ndeshjet janë të vështira”, deklaroi Rama për Art Sport.

“Inkuadrimi i Muratit? Ia njohim cilësitë. Kemi punuar shumë gjatë javës dhe sot na ndihmoi për të konkretizuar aksionin e golit të dytë”.

“Ndeshjen e radhës e luajmë ndaj Feronikelit, që e ka nisur shumë mirë kampionatin. Sigurisht që do të jetë një ndeshje e vështirë, mirëpo ne do të punojmë shumë për t’u përmirësuar në këtë kohë të shkurtër që e kemi në dispozicion”, përfundoi ai. /Zeri.info