Zyrtare: Klubi i Superligës me sponsor të ri
Klubi i sapoinkuadruar në elitën e futbollit kosovar, Dukagjini i Klinës, është bërë me sponsor të ri, shkruan Zëri.info.
Lajmi konfirmohet nga klubi derisa "Getrinke Vrella" do ta ndihmojë klubin me mjete financiare.
Njoftimi i Dukagjinit pa ndërhyrje:
Kemi kënaqësinë të iu njoftojmë se K.F. Dukagjini ka nënshkruar marrëveshje sponsorizimi me kompaninë e suksesshme “Getrinke Vrella”, e cila do ta mbështesë klubin me mjete financiare gjatë sezonit futbollistik 2019-2020. Marrëveshja u nënshkrua nga Drejtori Sportiv i klubit, z. Fabian Veseli dhe pronari kompanisë “Getrinke Vrella”, z. Gani Dreshaj, ndërsa gjatë nënshkrimit të marrëveshjes i pranishëm ishte edhe Kryetari i Komunës, Prof. Dr. Zenun Elezaj. Me rastin e nënshkrimit të marrëveshjes, Kryetari i Komunës, Prof. Dr. Zenun Elezaj, dhe drejtori i klubit, Fabian Veseli, kanë falënderuar z. Dreshaj për përkrahjen financiare që po i jep klubit dhe kanë theksuar se ky është një kontribut i rëndësishëm për lojtarët dhe klubin. Ndërsa, z. Dreshaj, i cili vazhdimisht ka qenë përkrahës i klubeve sportive dhe sportistëve, theksoi se klubi i Dukagjinit me organizimin e mirë që ka bërë vitet e fundit dhe qasjen serioze i ka dhënë klubit drejtimin e duhur dhe ka dëshmuar se meriton një përkrahje si nga tifozët po ashtu edhe nga bizneset. Të gjithë në klubin KF Dukagjini dhe qytetin e Klinës e falënderojmë z. Gani Dreshajn.
