Panucci flet për dy ndeshjet e para në krye të Kombëtares

Christian Panucci, selektori i Kombëtares, ka folur për dy ndeshjet e para në krye të ekipit kuqezi

Trajneri italian, Christian Panucci e ka nisur mirë aventurën te Shqipëria. Ai ka fituar ndaj Lihtenshtajnit (2:0), derisa ka barazuar me Maqedoninë (1:1).

Panucci, në konferencë për shtyp të mbajtur gjatë ditës së enjten në ambientet e FSHF-së, analizoi me detaje dy ndeshjet me Lihtenshtajnin e Maqedoninë.

“Tani i njoh më tepër futbollistët e mi. Duke vlerësuar momentin delikat të sezonit sepse është vetëm fillimi dhe shumë lojtarë po luajnë me vështirësi në klubet e tyre. I trembesha shumë këtyre dy ndeshjeve, pikërisht prej gjendjes fizike të skuadrës. Siç e pamë, Franca me Luksemburgun barazoi. Mundëm Lihtenshtajnin dhe u duk gjithçka e thjeshtë, por absolutisht nuk ishte e lehtë”, ka deklaruar ai.

“ Në fund jam i kënaqur nga këto dy ndeshje, sepse Lihtenshtajni nuk goditi asnjëherë në portë, edhe pse kemi luajtur shumë ngadalë në 30 minutat e para, por duke patur një ide për atë që duhet të bënim në fushë. Ndërsa, në pjesën e dytë skuadra e qarkulloi topin më shpejt, gjetëm avantazhin. Kemi lojtarë si Memushaj, Ajeti apo Roshi që kanë vështirësi në skuadrat e tyre dhe kishin pak minuta në këmbë”, shtoi Panucci.

“Ndaj Maqedonisë zgjodha Lilën dhe Kukelin, edhe sepse i trembesha dëshirës së kundërshtarëve për të fituar, duke sakrifikuar disi në aspektin e lojës. Por, në të njëjtën kohë rreshtova katër lojtarë në sulm, Hyka, Roshi, Sadiku dhe Llullaku. I trembesha faktit se nëse humbitnim topin dhe do të kishim katër lojtarë në sulm, Maqedonia mund të na godiste në kundërsulm .Edhe pse në pjesën e parë nuk luajtëm mirë, nuk vuajtëm.”, vazhdoi italiani.

“Në pjesën e dytë zgjodha të hedh më tepër kualitet në fushë, edhe prej karakteristikave të lojtarëve në fushë. Menjëherë erdhi reagimi psikologjik i ekipit dhe gjetëm goli. Kjo erdhi prej njohjes që kam për skuadrën. Tani që e njoh më tepër ekipin, jam i sigurt se sa më shumë kualitet të hedh në fushë, aq më mirë luan ekipi. Nëse Sadiku do të shënonte golin e dytë, unë do të isha i mirë sepse mund të fitonim. Por, rrezikuam edhe të humbitnim. Skuadra ra fizikisht dhe në 25 minutat e fundit Maqedonia e shfrytëzoi. Mund të fitonim 2-0, por në minutat e fundit edhe mund të humbitnim”, përfundoi ish trajneri i Livornos. /Express/