Për shkak të luftës, Izraeli ndryshon prezantimin e këngës që do ta përfaqësojë në Eurovision

Publikimi i këngës përfaqësuese të Izraelit për “Eurovision Song Contest 2026”, i planifikuar për të enjten e ardhshme, do të realizohet në një format të pazakontë. Transmetuesi publik izraelit “Kan 11” njoftoi se prezantimi do të xhirohet dhe transmetohet pa praninë e publikut në studio, ndryshe nga planet fillestare.

Pavarësisht kushteve sfiduese dhe klimës së tensionuar në vend, transmetuesi vendosi të mos e shtyjë spektaklin, me synimin për t’u ofruar shikuesve një moment arratisjeje përmes muzikës dhe një ndjenje bashkimi kombëtar, transmeton Zeri.info.

Noam Bettan, përfaqësuesi i Izraelit në Eurovision 2026 dhe fitues i talent shouit “HaKokhav HaBa”, do ta prezantojë për herë të parë këngën që do ta përfaqësojë vendin në Vjenë, Austri.

Gjatë programit special në “Kan 11” do të transmetohet edhe videoklipi zyrtar, i realizuar javët e fundit në kushte të rrepta sigurie, si dhe një intervistë ekskluzive me Bettan, i cili do të ndajë emocionet dhe pritshmëritë e tij para paraqitjes në skenën më të madhe muzikore në Evropë.

Organizatorët kanë bërë të ditur se, nëse situata e sigurisë e kërkon, transmetimi do të ndërpritet menjëherë për t’u zhvendosur në studion e lajmeve në Jerusalem për përditësime në kohë reale.

Programi do të realizohet nga studiot në Neve Ilan, duke respektuar udhëzimet e Komandës së Frontit të Brendshëm.

Izraeli do të garojë në gjysmëfinalen e parë më 12 maj, në përpjekje për të siguruar një nga dhjetë biletat për finalen e 16 majit. /Zëri