Vdes në moshën 46-vjeçare aktori i “The Wire”, James Ransone

Aktori amerikan James Ransone, i njohur gjerësisht për rolin e tij si Ziggy Sobotka në serialin legjendar të HBO-së The Wire, ka vdekur në moshën 46-vjeçare në Los Angeles.

Sipas Zyrës së Mjekut Ligjor të Qarkut të Los Angeles, vdekja e aktorit është cilësuar si vetëvrasje, raportojnë mediat ndërkombëtare, duke përfshirë Daily Mail.

Ransone u bë i njohur për publikun televiziv me paraqitjen e tij në sezonin e dytë të “The Wire” në vitin 2003, një serial që konsiderohet gjerësisht si një nga dramat më me ndikim në historinë e televizionit. Roli i Ziggy Sobotkës mbetet një nga interpretimet më të paharrueshme të tij.

Gjatë karrierës, ai u shfaq në disa prodhime të rëndësishme televizive dhe kinematografike, duke përfshirë Generation Kill, Treme, Bosch, si dhe në filma të suksesshëm si Sinister, It Chapter Two dhe The Black Phone.

Në vitet e fundit, James Ransone kishte folur hapur për sfidat personale, përfshirë varësinë dhe traumën e abuzimit seksual, duke u kthyer në një zë të rëndësishëm për ndërgjegjësimin mbi shëndetin mendor dhe nevojën për mbështetje profesionale.

Aktori ishte i martuar me Jamie McPhee dhe la pas dy fëmijë. Pas lajmit të ndarjes së tij nga jeta, bashkëshortja ka nisur një fushatë për mbledhje fondesh në mbështetje të Aleancës Kombëtare për Sëmundjet Mendore (NAMI).

Vdekja e James Ransone ka shkaktuar reagime të shumta nga fansat dhe kolegët e tij, të cilët e kanë kujtuar si një aktor të talentuar, të sinqertë dhe të guximshëm për mënyrën se si foli publikisht për betejat e tij personale. /kultplus