Bella Hadid flet hapur për betejën e gjatë me depresionin: E nisja çdo ditë me lot

Modelja Bella Hadid ka folur sinqerisht për luftën e saj të gjatë me ankthin dhe depresionin.

Përmes një postimi emocional në rrjetet sociale, Hadid iu drejtua kujtdo që përballet me sfida të ngjashme duke ndarë mesazhe mbështetjeje.

Konkretisht, në postim, ndau një sërë citatesh motivuese, njëra prej të cilave spikat veçanërisht sepse pasqyron luftën e brendshme që shumë njerëz po përjetojnë sot.

"Kur barra bëhet shumë e rëndë dhe e ardhmja duket e zymtë, është në rregull të pushosh një moment - edhe nëse ndihesh sikur e ke humbur shkëndijën. Kur ndihesh sikur je jashtë trupit tënd dhe nuk mund ta pranosh realitetin, nuk ke pse të kërkosh bukuri në gjithçka. Ndonjëherë, kur gjithçka bëhet e frikshme, mbijetesa bëhet përparësi. Ne përqendrohemi vetëm në atë që na duhet për të mbijetuar. Çdo gjë tjetër bie në plan të dytë sepse qëllimi është vetëm të ndihemi të sigurt", filloi ajo në postim.

Modelja theksoi se kjo ndjenjë e të qenit i mbingarkuar është arsyeja pse shpesh nuk jemi në gjendje të mendojmë qartë.

"Në momente të tilla, mendimet vërtiten njëra pas tjetrës. Ndalo. Merr frymë thellë. Do të jesh mirë. Mos mendo shumë për të ardhmen, përqendrohu vetëm te e sotmja. Ndonjëherë pyetjet 'po sikur' janë shumë të vështira. Prandaj kujtoji vetes se momenti i tanishëm është e tëra që ke. Ji i pranishëm dhe thjesht merr frymë", tha tutje.

Së bashku me citimet, Bella foli hapur për përvojën e saj me shëndetin mendor.

"Kam mbajtur barrën e ankthit dhe depresionit për vite me radhë. Ndonjëherë bëhet aq intensiv sa më paralizon plotësisht - edhe pse askush nga jashtë nuk mund ta shohë. E filloja çdo ditë me lot”.

E përfundoi mesazhin e saj me fjalë mbështetjeje për të gjithë ata që po kalojnë momente të ngjashme.

"Për të gjithë ju që përballeni me të njëjtat ndjenja çdo ditë - nuk jeni vetëm. Dhe ju dua shumë", tha ajo.