Ankandi zbulon fillimet e hershme të Tom Cruise në Hollivud
Një dokument i rrallë që hedh dritë mbi ditët e para të Tom Cruise-it si aktor në ngjitje në Mbretërinë e Bashkuar do të shitet në ankand.
Bëhet fjalë për një “Certifikatë regjistrimi” të vitit 1984, ku shfaqet aktori 21-vjeçar me emrin e tij të lindjes, Thomas C. Mapother IV, të firmosur me stilolaps të zi mbi një foto në formatin e pasaportës.
Shtëpia e ankandeve RR Auction në Boston thotë se dokumenti zyrtar i punësimit, i vulosur nga Policia e Thames Valley, iu lëshua Cruise-it gjatë qëndrimit të tij në Angli për xhirimet e filmit fantastiko-epik të Ridley Scott, Legend (1985).
Libreza prej 16 faqesh përmban të dhëna bazë si emri, datëlindja, kombësia dhe leja e punës, ndërsa vendi i punës figuron Pinewood Studios me profesionin e thjeshtë “Aktor – Legend Production”.
Dokumenti, i vlerësuar rreth 5900 £ (8000 $), përfaqëson një periudhë vendimtare për Cruise-in, që sapo kishte pasur sukses me Risky Business (1983), roli që i solli nominimin e parë për Golden Globe.
Sipas RR Auction: “Në fillim të vitit 1984, ai ishte në Britani duke u përgatitur për Legend, film që e forcoi si aktor kryesor, pak para se Top Gun t'i jepte famë botërore. Ky dokument personal u ofron koleksionistëve një vështrim intim mbi Cruise-in pak para se të bëhej yll, ende duke përdorur mbiemrin Mapother.”
Dokumenti, i ruajtur nga një anëtar i ekipit pas xhirimeve të Top Gun, do të jetë pjesë kryesore e ankandit “Remarkable Rarities”, që zhvillohet online dhe përfundon më 20 shtator në Boston./ Daily Mail
