Shkodra Elektronike publikon EP-në “Shndrit” pas suksesit në Eurovision 2025
Pas një performance elektrizuese në skenën e Eurovision 2025, ku u vlerësuan gjerësisht për origjinalitetin dhe energjinë e veçantë, Shkodra Elektronike kanë publikuar projektin e tyre më të fundit – EP-në “Shndrit”.
Titulli “Shndrit” nuk është i rastësishëm: jo vetëm që përfaqëson frymën dhe mesazhin e këngës që ata interpretuan në Eurovision, por është tashmë një fjalë që ka fituar jehonë edhe përtej kufijve shqiptarë, duke u bërë simbol i stilit dhe shpirtit të grupit.
EP-ja përmban tri këngë të reja, përfshirë këtu edhe këngën “Zjerm”, me të cilën grupi u ngjit në skenën evropiane, si dhe një remix të saj, që sjell një dimension të ri të energjisë së saj ritmike.
Projekti është i disponueshëm në të gjitha platformat digjitale dhe është pritur me interes të madh nga fansat në Shqipëri dhe jashtë saj.
Ky publikim vazhdon të ndërtojë identitetin artistik të veçantë të Shkodrës Elektronike, duke ndërthurur elementët e pasur të trashëgimisë kulturore shqiptare me ritmet moderne të muzikës elektronike.
“Shndrit” konfirmon se grupi jo vetëm që sjell një tingull ndryshe, por edhe ruan një lidhje të thellë me rrënjët kulturore, duke i prezantuar ato në një format bashkëkohor dhe ndërkombëtar.
Ky projekt është një dëshmi e qartë se Shkodra Elektronike po ndërton një karrierë të qëndrueshme dhe me identitet të qartë artistik, duke ndriçuar gjithnjë e më shumë në skenën muzikore moderne. /Telegrafi
