Zarf i zi në BBVA, anulohet televotimi pas incidentit me Gjestin

Një ngjarje e papritur ka tronditur shtëpinë e Big Brother VIP Albania gjatë dasmës së Jozit dhe Loredanës.

Në një moment tensioni Gerta Gixhari i hodhi aksidentalisht alkool në sy Gjestit, duke i shkaktuar irritim dhe shqetësim të menjëhershëm.

Për shkak të gjendjes së tij, ai u detyrua të largohej nga shtëpia për të marrë ndihmë mjekësore.

Ky incident shkaktoi një reagim të fortë nga banorët. Rozana, e revoltuar nga veprimi i Gertës, pati një debat të ashpër me të, ndërsa Egli dhe Livian u prekën emocionalisht, duke shpërthyer në lot për shëndetin e Gjestit.

Pak pas rikthimit të tij në shtëpi, Vëllai i Madh dërgoi një zarf të zi, duke njoftuar se televotimi i javës do të anulohej për shkak të shkeljes së rregullave.

Ndërkohë, pritet që në Prime-in e së martës të merret një vendim përfundimtar mbi masën që do të merret ndaj Gertës.

Banorët dhe publiku janë në pritje të vendimit të madh, i cili pritet të sjellë tensione dhe debate të reja në shtëpi.