Eurovisioni ndalon flamurin palestinez: Kushdo që sjell një të tillë, do të ndalohet nga rojet

Agjencia suedeze e lajmeve TT njoftoi se kushdo që përpiqet të sjellë një flamur palestinez ose një tabelë me një mesazh politik në hyrje të “Malmo Arena” gjatë Festivalit të Këngës në Eurovision, do të ndalohet nga rojet.

Organizatorët e Eurovisionit thanë të enjten se rezervojnë të drejtën për të hequr flamujt palestinezë dhe simbolet pro-palestineze gjatë shfaqjeve gjysmëfinale dhe finale të konkursit javën e ardhshme në Suedi.

Njoftimi u bë mes tensioneve të rritura rreth pjesëmarrjes së Izraelit në konkursin muzikor. Grupet pro-palestineze pritet të organizojnë protesta të mëdha në Malmo për të rritur ndërgjegjësimin për luftën në Gaza.

Michelle Roverelli, kreu i komunikimit për Unionin Evropian të Transmetuesve, i cili organizon konkursin, tha se audienca lejohej të sillte dhe shfaqte vetëm flamuj që përfaqësonin vendet pjesëmarrëse në ngjarje, si dhe flamurin ylber.

EBU me bazë në Gjenevë rezervon të drejtën “të heqë çdo flamur apo simbol tjetër, veshje, objekte dhe banderola”, thuhet në deklaratën për Associated Press.

Agjencia suedeze e lajmeve TT raportoi se kushdo që përpiqet të sjellë një flamur palestinez ose një tabelë me një mesazh politik në hyrje do të ndalohej nga rojet. Martin Osterdahl, mbikëqyrës ekzekutiv i konkursit, tha për TT se “këto rregulla janë të njëjta si vitin e kaluar – nuk ka asnjë ndryshim”.

Konkursi, i cili tërheq qindra miliona shikues çdo vit, zhvillohet këtë vit nga 7 deri më 11 maj në Malmo pas fitores së vitit të kaluar nga Loreen me këngën “Tattoo”.