Shkencëtarët zhvillojnë një gju biologjik që mund të rigjenerojë indet e dëmtuara

Një grup shkencëtarësh amerikanë po zhvillon një teknologji të re që synon të ndryshojë mënyrën e trajtimit të artrozës së gjurit, duke krijuar një zëvendësues biologjik që mund të rigjenerojë indet e dëmtuara dhe të zvogëlojë nevojën për proteza tradicionale metalike.

Studiuesit nga Universiteti Columbia kanë krijuar një strukturë tridimensionale të biodegradueshme, e cila mbushet me qeliza të kërcit dhe kockës. Kjo strukturë është projektuar që gradualisht të zëvendësohet nga inde të gjalla, duke rikthyer funksionin natyror të nyjës, shkruan The Washington Post, transmeton Gazeta Shneta.

Gjatë eksperimenteve, gjuri biologjik është vendosur në gjunjë njerëzorë të marrë nga trupa të dhuruar për kërkime shkencore dhe është testuar përmes pajisjeve robotike që simulojnë ecjen. Rezultatet treguan se struktura përballoi ngarkesa të konsiderueshme mekanike pa u dëmtuar.

Teknologjia është pjesë e projektit NITRO, i cili përfshin disa universitete amerikane që po zhvillojnë metoda të ndryshme për rigjenerimin e kërcit dhe kockës. Disa prej tyre synojnë përdorimin e qelizave të modifikuara gjenetikisht për të prodhuar proteina që luftojnë inflamacionin dhe nxisin riparimin e indeve.

Megjithatë, shkencëtarët theksojnë se këto trajtime mbeten eksperimentale dhe ende nuk është vërtetuar siguria apo efektiviteti i tyre te pacientët e gjallë. Nëse studimet e ardhshme klinike rezultojnë të suksesshme, teknologjia mund të ofrojë një alternativë të rëndësishme për miliona persona që vuajnë nga artroza e gjurit.