Kanceri shfaqet dy herë më shpesh te personat me diabet të tipit 2
Personat me diabet të tipit 2 kanë rreth dy herë më shumë raste të kancerit, krahasuar me njerëzit pa diabet, sipas një studimi të ri që ka analizuar të dhënat shëndetësore të të gjithë të rriturve në Danimarkë për një periudhë 25-vjeçare.
Studimi, i cili pritet të prezantohet në takimin vjetor të Shoqatës Evropiane për Studimin e Diabetit, ka analizuar të dhënat nga viti 1996 deri në vitin 2022, duke krahasuar rastet e diabetit të tipit 2 dhe kancerit.
Sipas gjetjeve, te personat me diabet të tipit 2 janë regjistruar 16.6 raste të kancerit për 1.000 persona në vit, ndërsa te personat pa diabet kjo shifër ishte 7.7 raste për 1.000 persona në vit.
Studiuesit vunë re gjithashtu një rritje më të madhe të rasteve të kancereve të lidhura me obezitetin te personat me diabet të tipit 2. Gjatë periudhës 2010-2022, këto kancere ishin 45% më të shpeshta te burrat dhe 30% më të shpeshta te gratë me diabet.
Në veçanti, kanceri i gjirit ishte rreth 8% më i shpeshtë te gratë me diabet të tipit 2. Ndërkohë, kanceri i zorrës së trashë u shfaq 17% më shpesh te burrat dhe 14% më shpesh te gratë me këtë sëmundje.
Një lidhje edhe më e theksuar u vu re për kancerin e pankreasit, rreziku i të cilit ishte rreth dy herë e gjysmë më i lartë te personat me diabet të tipit 2.
“Gjetjet tona tregojnë barrën në rritje të kancerit te personat me diabet të tipit 2 dhe nevojën për t’i dhënë përparësi parandalimit dhe zbulimit të hershëm të kancerit si pjesë e kujdesit afatgjatë për diabetin”, tha studiuesja kryesore, Tinne Laurberg, nga Steno Diabetes Center Aarhus në Danimarkë.
Sipas saj, kjo është veçanërisht e rëndësishme për kanceret e zakonshme të lidhura me obezitetin, përfshirë kancerin kolorektal dhe atë të gjirit pas menopauzës, për të cilat në shumë vende ekzistojnë programe të depistimit.
Megjithatë, studiuesit theksojnë se studimi nuk është dizajnuar për të përcaktuar pse diabeti i tipit 2 lidhet me një rrezik më të lartë të kancerit. Për të kuptuar më mirë këtë lidhje nevojiten kërkime të mëtejshme.
Studimi do të prezantohet në Milano, në kuadër të takimit të Shoqatës Evropiane për Studimin e Diabetit, që mbahet nga 28 shtatori deri më 2 tetor. Gjetjet e prezantuara në konferenca mjekësore konsiderohen paraprake derisa të publikohen në një revistë shkencore të rishikuar nga kolegët.
