Testi i ri me pesë pyetje mund të ndihmojë në diagnostikimin e hershëm të endometriozës
Endometrioza është një sëmundje kronike gjinekologjike që prek rreth 10% të grave në moshë riprodhuese në botë. Sëmundja ndodh kur ind i ngjashëm me atë që vesh brendësinë e mitrës fillon të rritet jashtë saj, zakonisht në vezore, tubat fallopiane ose në pjesë të tjera të zgavrës abdominale.
Një studim i ri ka zhvilluar një test të thjeshtë me pesë pyetje, i cili mund të përdoret për të identifikuar më shpejt gratë që mund të vuajnë nga kjo sëmundje, shkruan The Courier-Mail, transmeton gazeta Shneta.
Pyetjet përqendrohen në simptomat kryesore, duke përfshirë:
- Dhimbjet e forta gjatë menstruacioneve;
- Dhimbjen gjatë marrëdhënieve seksuale;
- Dhimbjet kronike në pjesën e poshtme të barkut;
- Menstruacionet e rënda;
- Problemet me fertilitetin.
Diagnoza e endometriozës shpesh vonohet sepse simptomat mund të ngatërrohen me probleme të tjera gjinekologjike. Në shumë raste, diagnoza përfundimtare kërkon ndërhyrje kirurgjikale minimale përmes laparoskopisë.
Sipas studiuesve, përdorimi i një mjeti të thjeshtë diagnostik mund të ndihmojë në zbulimin më të hershëm të sëmundjes dhe fillimin më të shpejtë të trajtimit, duke përmirësuar cilësinë e jetës së pacientëve.
