Ecja herët në mëngjes mund të rrisë rrezikun e atakut në zemër
Shëtitjet në mëngjeset e dimrit shpesh konsiderohen si një zakon i shëndetshëm dhe energjik për të nisur ditën, por kardiologët paralajmërojnë se temperaturat e ulëta, mund të rëndojnë ndjeshëm zemrën dhe trurin, shkruan “The Guardian”.
Ekspozimi ndaj të ftohtit shkakton ngushtimin e enëve të gjakut, trashjen e gjakut dhe rritjen e mundësisë së formimit të mpiksjeve.
Ky reagim natyror i trupit për të ruajtur nxehtësinë mund të rrisë presionin e gjakut dhe të vështirësojë qarkullimin normal.
Kur këto efekte kombinohen me sforcim të papritur fizik menjëherë pas zgjimit — një moment kur organizmi ende po kalon nga gjendja e pushimit në aktivitet — zemra mund të mbingarkohet.
Kjo situatë rrit rrezikun e sulmit në zemër, veçanërisht tek personat që vuajnë nga tensioni i lartë i gjakut, diabeti, kolesteroli i lartë ose sëmundje të padiagnostikuara të zemrës.
Në orët e para të mëngjesit, presioni i gjakut dhe niveli i hormoneve të stresit rriten natyrshëm, duke e bërë sistemin kardiovaskular më të ndjeshëm ndaj stresit shtesë.
Moti i ftohtë lidhet gjithashtu me një rritje të rrezikut për goditje në tru.
Qarkullimi i reduktuar i gjakut dhe spazmat e arterieve mund të pengojnë furnizimin e mjaftueshëm me oksigjen në tru, duke krijuar kushte më të favorshme për formimin e mpiksjeve.
Simptomat paralajmëruese mund të jenë të lehta ose të paqarta, veçanërisht tek të moshuarit, gratë dhe personat me diabet, çka e bën edhe më të rëndësishëm reagimin e shpejtë.
Shenjat që kërkojnë vëmendje përfshijnë shtrëngim ose dhimbje në gjoks, gulçim, lodhje të pazakontë, të përziera, marramendje, dobësi në njërin krah ose vështirësi në të folur.
Edhe simptoma që duken të lehta nuk duhen neglizhuar, pasi ato mund të jenë paralajmërim i një problemi serioz.
Për të ulur rrezikun, ekspertët këshillojnë që shëtitjet të shtyhen deri pas lindjes së diellit, kur temperaturat rriten disi dhe trupi ka pasur më shumë kohë për t’u zgjuar plotësisht.
Rekomandohet një nxehje e lehtë brenda për 8–10 minuta përpara se të dilni jashtë, veshje me shtresa për të ruajtur temperaturën e trupit dhe konsum i mjaftueshëm i lëngjeve për të shmangur dehidratimin.
Gjithashtu, është e rëndësishme të dëgjoni sinjalet e trupit dhe të ndaloni menjëherë aktivitetin nëse shfaqet ndonjë shqetësim.
Kujdesi dhe planifikimi i duhur mund të ndihmojnë në mbrojtjen e shëndetit të zemrës dhe trurit gjatë ushtrimeve në dimër, duke e bërë aktivitetin fizik të sigurt dhe të dobishëm edhe në temperaturat e ulëta.
