Rreziqet shëndetësore nga konsumi i lartë i sheqerit

Edhe pse sheqeri ka shije të këndshme, konsumimi i tij në sasi të tepërta mund të ketë pasoja serioze për shëndetin. Sipas Natalie Rizzo, dietologe e licencuar, një nga shenjat më të qarta të konsumit të lartë të sheqerit është ndjesia e vazhdueshme e urisë dhe pamundësia për t’u ndier i ngopur edhe pas një vakti të plotë.

Sa sheqer është shumë?

Sipas Shoqatës Amerikane të Zemrës, meshkujt nuk duhet të konsumojnë më shumë se 9 lugë çaji (36 gramë ose rreth 150 kalori) sheqer të shtuar në ditë, ndërsa gratë duhet ta kufizojnë konsumin në 6 lugë çaji (25 gramë ose rreth 100 kalori). Nga ana tjetër, udhëzimet dietike të SHBA-së (2020–2025) lejojnë deri në 50 gramë sheqer të shtuar në një dietë prej 2000 kalorish, megjithëse kjo sasi konsiderohet kufiri maksimal.

Sheqeri natyral dhe sheqeri i shtuar

Sheqernat natyrale gjenden në fruta, perime, bulmet, bishtajore dhe drithëra të plota. Këto ushqime janë të pasura me fibra, vitamina dhe antioksidantë, prandaj nuk ka arsye të shmangen. Ndryshe nga to, sheqernat e shtuara përdoren gjatë përpunimit të ushqimeve për të përmirësuar shijen dhe gjenden jo vetëm në ëmbëlsira e pije të gazuara, por edhe në produkte të përditshme si buka, drithërat, kosët, salcat dhe supat.

Pasojat e konsumit të lartë të sheqerit

Ushqimet e pasura me sheqer të shtuar nuk japin ndjesi ngopjeje. Studimet tregojnë se sheqeri çrregullon sinjalet e urisë dhe ngopjes, rrit oreksin dhe çon në konsum të tepërt kalorish, duke favorizuar shtimin në peshë. Në afat të gjatë, ai lidhet me prishjen e dhëmbëve dhe rrit rrezikun për tension të lartë të gjakut, sëmundje të zemrës, kancer dhe vdekje të parakohshme. /Gazeta Shneta