IKSHPK: Vaksinimi kundër fruthit nuk shkakton autizëm, rreziku vjen nga mosvaksinimi
Në vitet e fundit janë përhapur disa informacione të pasakta që pretendojnë se vaksina kundër fruthit shkakton autizëm dhe se kjo nuk është e vërtetë.
Kështu ka njoftuar Instituti Kombëtar i Shëndetit Publik, i cili thekson se rreziku më i madh për shëndetin vjen nga mosvaksinimi, e jo nga vaksinat.
Sipas institutit, në Kosovë, për dekada me radhë, vaksinimi kundër fruthit ka qenë një nga masat më të suksesshme të shëndetit publik.
IKSHPK rikujton se fruthi, i cili dikur ishte një shkaktar i shpeshtë i hospitalizimeve dhe vdekjeve, është vënë nën kontroll falë vaksinës MMR, vaksinë që mbron nga fruthi, shytat dhe rubeola. Specialistë të Mjekësisë Familjare tregojnë për rëndësinë e vaksinimit kundër fruthit.
“Fruthi është një sëmundje mjaft ngjitëse, e cila përhapet shumë shpejt. Arsyeja e vaksinimit është ulja e ndjeshme e rrezikut të komplikimeve, si pasojë e sëmundjes së fruthit, përfshirë edhe verbimin. Vaksina ndihmon në forcimin e imunitetit te fëmijët me imunitet të dobësuar dhe kontribuon në parandalimin e epidemive”, tha Besim Murseli, shef i Mjekësisë Familjare nr. 1 në Prishtinë.
Ai shton se përballë fruthit, vaksinimi mbetet mënyra më efektive për mbrojtjen e shëndetit tonë.
“Efektet kryesore janë ato që prekin sistemin respirator, shfaqja e skuqjeve të përgjithshme në trup dhe dobësimi i imunitetit. Vaksina është efikase dhe e sigurt. Ajo nuk shkakton autizëm; shumë punime shkencore nuk kanë gjetur asnjë ndërlidhje mes vaksinimit dhe autizmit”, vazhdoi ai.
Instituti Kombëtar i Shëndetit Publik rikujton se profesionistët shëndetësorë janë burimi kryesor i informacionit për prindërit, duke i inkurajuar ata që të informohen gjithmonë për vaksinimin dhe rëndësinë e tij në mbrojtjen e shëndetit të fëmijëve./rtk
