Testet shtëpiake për sëmundjet seksualisht të transmetueshme mund të ndikojnë në uljen e rasteve

Teste të reja për përdorim në shtëpi për zbulimin e sëmundjeve seksualisht të transmetueshme (SST) janë miratuar së fundmi në Shtetet e Bashkuara dhe mund të kontribuojnë në uljen e rasteve të infeksioneve.

Autoritetet shëndetësore kanë miratuar testin e parë shtëpiak që zbulon njëkohësisht gonorrenë, klamidian dhe trikomoniazën te gratë, si dhe kompletin e parë për vetë-testim të HPV-së, virusit që lidhet me kancerin e qafës së mitrës, shkruan Euronews transmeton Gazeta Shneta.

Po ashtu, janë miratuar dy barna të reja për trajtimin e gonorresë, opsionet e para të reja pas dekadash, në një kohë kur rezistenca ndaj antibiotikëve ka qenë problem në rritje.

Sipas të dhënave paraprake, rastet e disa SST-ve kanë shënuar rënie vitet e fundit, ndërsa ekspertët vlerësojnë se testimi në shtëpi mund të rrisë qasjen në diagnostikim, pavarësisht sfidave në monitorimin e të dhënave dhe kostos së testeve.