Mos prisni shumë gjatë: Gjashtë simptoma që tregojnë probleme me fertilitetin

Infertiliteti shpesh është i heshtur, por ndonjëherë trupi dërgon sinjale që tregojnë pse mund të keni vështirësi për të mbetur shtatzënë

Dëshironi të keni një fëmijë? Pavarësisht nëse planifikoni shtatzëninë tani apo në të ardhmen, është krejt e natyrshme të pyesni veten nëse gjithçka do të shkojë mirë – nga ngjizja deri te lindja.

Sot, infertiliteti prek rreth 10-15% të çifteve. Sipas Organizatës Botërore të Shëndetësisë, infertiliteti përkufizohet si pamundësia për të arritur shtatzëni pas të paktën një viti marrëdhëniesh seksuale të rregullta dhe të pambrojtura.

Disa specialistë përfshijnë në këtë përkufizim edhe pamundësinë për ngjizje pas 6 muajsh te gratë mbi 35 vjeç. Nëse shtatzënia nuk ndodh brenda këtij afati, mund të ketë një problem që kërkon vlerësim mjekësor.

Nëse vëreni ndonjë nga simptomat e mëposhtme, është e rëndësishme të kontaktoni gjinekologun tuaj për të përcaktuar nëse ekziston vërtet një problem.

1. Mungesa e menstruacioneve

Nëse keni përdorur kontraceptivë hormonalë, trupit mund t’i duhen disa muaj për t’u rregulluar dhe për të rifilluar ovulacionin. Megjithatë, nëse pas tre muajsh nuk keni menstruacione, duhet të konsultoheni me mjekun.

“Mungesa e menstruacioneve sugjeron se gruaja nuk ovulon dhe ka shumë pak gjasa të mbetet shtatzënë pa ndihmë”, shpjegon Lorna Marshall, endokrinologe riprodhuese.

Zgjidhja mund të jetë e thjeshtë, si marrja ditore e një tablete për stimulimin e ovulacionit. Nëse kjo nuk funksionon, hapat e tjerë përfshijnë terapi me injeksione hormonale, inseminim intrauterin (IUI) ose fekondim in vitro (IVF).

2. Menstruacione të parregullta

Nëse cikli juaj menstrual nuk është i rregullt, mund të mos e dini kurrë saktë kur ovuloni, apo nëse ovuloni fare.

“Ciklet që shfaqen në mënyrë sporadike tregojnë për një çrregullim themelor të ovulacionit, gjë që e bën konceptimin shumë sfidues,” thotë Shoiva Talebian, endokrinologe riprodhuese.

Shkaqet janë të ngjashme me ato të mungesës së plotë të menstruacioneve, përfshirë:

sindromën e vezoreve policistike (PCOS),

çrregullimet e gjëndrës tiroide,

amenorrenë hipotalamike.

Ciklet e parregullta mund të jenë gjithashtu shenjë e rezervës së reduktuar ovariane, e shkaktuar nga endometrioza ose nga dështimi i hershëm i vezoreve, transmeton Telegrafi.

3. Gjakderdhje ndërmjet menstruacioneve

Gjakderdhja duhet të ndodhë vetëm gjatë menstruacioneve. “Gjakderdhja ndërmjet cikleve ose pas marrëdhënieve seksuale mund të tregojë praninë e polipeve, fibromave të mitrës ose lezionit të qafës së mitrës”, shpjegon dr. Talebian.

Përveç ndikimit në fertilitet, është e rëndësishme që gjinekologu të përjashtojë edhe probleme më serioze, si kanceri edhe pse kjo ndodh rrallë.

4. Menstruacione shumë të bollshme

Nëse keni nevojë të ndërroni më shumë se një pecetë ose tampon brenda një ore, nëse vëreni koagula të mëdha gjaku ose nëse gjakderdhja zgjat më shumë se 7 ditë, menstruacionet tuaja konsiderohen jashtëzakonisht të bollshme.

“Kjo mund të jetë shenjë e miomave të mitrës”, thotë Marsi F. Maguire, endokrinologe riprodhuese. Menstruacionet e bollshme lidhen gjithashtu me çrregullime të koagulimit të gjakut ose me anomali hormonale.

Miomat mund të zvogëlohen ose të hiqen nëse pengojnë shtatzëninë, ndërsa çrregullimet e gjakut trajtohen me terapi medikamentoze.

5. Dhimbje në legen

Dhimbjet e forta, krampet gjatë ciklit ose dhimbja pas marrëdhënieve intime mund të jenë shenjë e endometriozës.

“Në endometriozë, indi që normalisht vesh brendësinë e mitrës gjendet jashtë saj, në legen”, shpjegon dr. Maguire. “Kjo gjendje mund të shkaktojë formimin e indeve mbresore, ulje të fertilitetit dhe rritje të rrezikut për shtatzëni jashtë mitre.”

Nëse dhimbjet shoqërohen me temperaturë dhe sekrecione jonormale, mund të bëhet fjalë për infeksion të legenit, i cili, nëse nuk trajtohet, mund të çojë në bllokim të tubave fallopiane.

6. Cikle shumë të shkurtra dhe gjakderdhje e lehtë

Nëse ciklet tuaja janë vazhdimisht më të shkurtra se 18 ditë, mund të mos ovuloni ose të mos prodhoni mjaftueshëm progesteron për të mbështetur një shtatzëni. Mjeku mund të kryejë analiza hormonale për të vlerësuar situatën.

Kur duhet të kërkoni ndihmë?

Nëse pas një viti marrëdhëniesh seksuale të pambrojtura nuk keni arritur shtatzëni, ose pas 6 muajsh nëse jeni 35 vjeç e lart, rekomandohet të drejtoheni te gjinekologu.

Gjithashtu, çdo simptomë si:

menstruacione të parregullta,

mungesë e menstruacioneve,

gjakderdhje ndërmjet cikleve,

është një arsye e mjaftueshme për një kontroll mjekësor në kohë.