Studim: Stresi i nënës gjatë shtatzënisë përshpejton daljen e dhëmbëve tek foshnjat

Një studim i publikuar në Frontiers in Oral Health tregon se stresi i nënës gjatë shtatzënisë ndikon drejtpërdrejt në kohën kur foshnjat nxjerrin dhëmbët e parë.

Sipas kërkuesve nga Universiteti i Rochester në SHBA, nivelet e larta të hormonit të stresit – kortizolit – tek nëna, sidomos në muajt e fundit të shtatzënisë, lidhen me “shpërthim” më të hershëm të dhëmbëve tek fëmijët.Dr. Ying Meng, autorja kryesore e studimit, tha se foshnjat e nënave me kortizol më të lartë kishin mesatarisht deri në katër dhëmbë më shumë në moshën 6 muajsh, krahasuar me fëmijët e nënave me nivele më të ulëta stresi.

Studimi ka analizuar 142 nëna nga familje me sfida ekonomike, duke matur nivelet hormonale gjatë shtatzënisë dhe duke ndjekur zhvillimin e dhëmbëve të fëmijëve deri në 2 vjeç. Rezultatet treguan se stresi prenatal mund të përshpejtojë zhvillimin biologjik të fëmijës dhe të shërbejë si një shenjë paralajmëruese për shëndetin oral dhe të përgjithshëm.

Sipas autorëve, nxjerrja e parakohshme e dhëmbëve mund të lidhet me ndikimin e kortizolit në zhvillimin e kockave, metabolizmin e kalciumit dhe vitaminës D. Ata theksojnë se nevojiten studime të tjera për të kuptuar plotësisht se si stresi i nënës ndikon në këtë proces.