Gjashtë shenja që tregojnë se jeni të dehidratuar dhe mund të mos e kuptoni fare

Kur ishte hera e fundit që pitë një gotë ujë? Shumica e njerëzve e dinë se duhet të pinë më shumë ujë, por hulumtimet tregojnë se mesatarja evropiane pi më pak se gjysmën e sasisë së rekomanduar ditore.

Kjo jo vetëm që ju lë të ndiheni të etur, por gjithashtu rrit rrezikun e dehidratimit dhe problemeve shëndetësore afatgjata.

“Uji është thelbësor për jetën dhe pothuajse çdo proces në trupin tonë”, tha për The Telegraph Stavros A. Kavouras, profesor i të ushqyerit në Universitetin e Arizonës  . “Ai rregullon temperaturën e trupit, transporton lëndët ushqyese, largon mbeturinat, lubrifikon nyjet dhe ndihmon tretjen. Gjithashtu mbron veshkat, zemrën dhe përmirëson performancën fizike.”

Uji përbën rreth 60% të trupit tonë dhe ne humbasim 2 deri në 2.5 litra çdo ditë përmes djersitjes, urinimit, jashtëqitjes dhe frymëmarrjes. Pa zëvendësim të rregullt të lëngjeve, rrezikojmë dehidratim. Edhe dehidratimi i lehtë mund të ndikojë në humor, përqendrim dhe shëndet, dhe në planin afatgjatë është lidhur me sëmundje si presioni i lartë i gjakut, diabeti dhe demenca.

Gjatë motit të nxehtë, dehidratimi mund të çojë shpejt në kolaps ose edhe në vdekje, dhe më të rrezikuarit janë të moshuarit, të sëmurët kronikë dhe njerëzit me diarre ose të vjella.

Shenjat që tregojnë se jeni të dehidratuar

Ndjenja e etjes. Nëse keni etje, jeni tashmë pak të dehidratuar. Kur humbni rreth 2% të peshës trupore në lëngje, truri dërgon një sinjal se keni etje. Tek të moshuarit, kjo ndjenjë është më e dobët, kështu që ata duhet të pinë ujë edhe kur nuk kanë etje.Urinë e errët. Urina me ngjyrë mjalti do të thotë që keni nevojë për më shumë ujë, ndërsa urina kafe e errët është shenjë e dehidratimit të rëndë. Mungesa e ujit rrit rrezikun e gurëve në veshka dhe infeksioneve të traktit urinar. Idealisht, duhet të urinoni rreth shtatë herë në ditë dhe urina juaj duhet të jetë e verdhë e çelët.

Ulje e qartësisë mendore. Truri përmban 73% ujë. Edhe dehidratimi i lehtë mund të ulë përqendrimin, kujtesën dhe koordinimin. Edhe një gotë ujë mund të përmirësojë kujtesën, ndërsa dehidratimi më i rëndë shkakton konfuzion dhe çorientim.

Dhimbje koke. Dehidratimi shpesh shkakton dhimbje koke sepse vëllimi i lëngjeve rreth trurit zvogëlohet. Këto dhimbje koke zakonisht zhduken brenda një ose dy orësh pasi të keni pirë mjaftueshëm ujë.

Lodhje dhe apati. Mungesa e lëngjeve trash gjakun dhe ushtron një ngarkesë në zemër, duke na bërë të ndihemi të rraskapitur. Tek të moshuarit, dehidratimi rrit rrezikun e ndërlikimeve dhe qëndrimeve më të gjata në spital.

Marramendje. Me një humbje prej 4% të peshës trupore në lëngje, mund të ndodhë rënie e tensionit të gjakut dhe të fikët. Kjo gjendje kërkon kujdes mjekësor pasi mund të çojë në dëmtim të organeve ose vdekje.