Doktori shqiptar Omer Xhemajli, mahnit stafin e Spitalit në Pekin

Një ndërhyrje revolucionare në fushën e kardiokirurgjisë po zhvillohet në Spitalin e Tretë të Universitetit të Pekinit (PKU), ku teknologjia më e avancuar në kirurgjinë minimale invazive po sjell një qasje të re ndaj trajtimit të sëmundjeve të ndërlikuara të zemrës.

Kirurgjia bypass e asistuar nga roboti, përmes sistemit kirurgjik “Da Vinci”, po ofron rikuperim më të shpejtë dhe më të sigurt për pacientët, duke tërhequr kështu vëmendjen ndërkombëtare.

Një nga emrat më të njohur të kardiokirurgjisë në Zvicër, Dr. med. Omer Xhemajli,i cili është edhe ligjërues në Universitetin e Pekinit, vizitoi së fundmi këtë institucion për të parë nga afër punën e ekipit mjekësor dhe për të dëshmuar performancën e sistemit robotik në sallën e operacionit. I njohur për përvojën e tij në operacionet e zemrës dhe drejtimin e Klinikës së Kardiokirurgjisë në Spitalin e Cyrihut, Dr. Xhemajli nuk kurseu vlerësimet.

“Është impresionuese të shohësh se si një teknologji e tillë po përdoret në mënyrë kaq të avancuar. Ekipi këtu jo vetëm që ka përsosur teknikën, por ka ndërtuar një model të kujdesit që fokusohet te rikuperimi i shpejtë dhe siguria e pacientit,” u shpreh ai pas demonstrimit kirurgjikal.

Vizita e Dr. Xhemajlit përbën një moment të rëndësishëm për Spitalin e Tretë të PKU-së, duke simbolizuar një hap të ri nga importimi i teknologjisë drejt eksportimit të ekspertizës dhe zgjidhjeve inovative në fushën mjekësore.

Kjo qasje moderne jo vetëm që i kursen pacientit një ndërhyrje të hapur dhe të dhimbshme, por ofron gjithashtu kohë më të shkurtër qëndrimi në spital dhe më pak komplikime post-operatore.

Me një vizion të qartë për të ardhmen, spitali synon të bëhet një qendër referimi ndërkombëtare për kirurgjinë robotike të zemrës. /Zëri