MSH: Situata me grip sezonal kalon pragun epidemik
Ministria e Shëndetësisë ka reaguar në lidhje me situatën e gripit sezonal, që ka kapluar të gjithë Kosovën.
Në një njoftim nga Ministria e Shëndetësisë është bërë e ditur se sipas IKSHPK-së në javët e para të 2024, ky grip sezonal ka pësuar rritje në krahasim me javën e kaluar dhe po kalon pragun epidemik.
Pas kësaj kjo ministri ka dalur me disa këshilla se si të jemi më të kujdesshëm.
Njoftim i plotë:
Si rrjedhojë apelojmë për vigjilencë të shtuar!
Në rast simptomash të gripit konsultoni mjekun familjar për këshilla dhe trajtim të duhur.
Masat e rëndësishme për parandalim:
1. Mbuloni hundën dhe gojën kur të teshtini dhe kolliteni;
2. Praktikoni higjienën e duarve dhe shmangni kontaktet e afërta me të sëmurët;
3. Nëse jeni të sëmurë, qëndroni në shtëpi për të parandaluar përhapjen e mëtejshme;
4. Ushqimi i shëndetshëm me më shumë lëngje, kryesisht vitaminoz dhe gjumi i mjaftueshëm janë të rëndësishëm.
Kujdes i shtuar për grupet më të rrezikuara:
Është veçanërisht e rëndësishme që grupet si: Personeli shëndetësor, gratë shtatëzëna, fëmijët, të moshuarit dhe personat me imunitet të dobësuar, të kenë kujdes më të shtuar gjatë sezonit të gripit.
Vaksinimi – mbetet mbrojtja më efikase:
Qysh në fillim të tetorit 2023 Ministria e Shëndetësisë ka siguruar 85,000 doza të vaksinës sezonale.
Vaksinimi është mbrojtja më e mirë kundër gripit.
Vaksinoheni një herë për të qenë të mbrojtur gjatë tërë sezonit kur gripi është më i shprehur.
Ju lutemi të ndiqni këshillat e mësipërme për të mbrojtur veten dhe të tjerët!
Fatëkeqësisht nuk është hera e parë që gripi sezonal po e kaplon të gjithë vendin, për shak se qytetarët kanë edhe simptoma të rënda./Zëri.
