“Psychology Today”: Njerëzit që preferojnë vetminë janë më besnikë në marrëdhënie

Një perspektivë e re në fushën e psikologjisë sugjeron se njerëzit që e shijojnë kohën vetëm mund të jenë partnerë dhe miq më të besueshëm dhe më besnikë.

Sipas një studimi të realizuar nga studiuesja Thuy-vy T. Nguyen në Universitetin e Durhamit, në Angli – në bashkëpunim me Netta Weinstein dhe Richard M. Ryan, preferenca për vetminë nuk lidhet domosdoshmërisht me izolimin apo mungesën e aftësive sociale, por me një tipar më të thellë – autonominë personale.

Çfarë tregoi studimi?

Studimi, i publikuar në revistën shkencore “Psychology Today” u bazua në ditarë ditorë të studentëve për disa ditë dhe analizoi mënyrën se si ata përjetonin kohën vetëm.

Rezultatet kryesore treguan se:
• Personat që zgjedhin vetminë me vullnet (jo nga detyrimi) kanë autokontroll emocional më të lartë
• Ata nuk varen nga aprovimi i të tjerëve
• Ndërtojnë marrëdhënie nga dëshira, jo nga nevoja

Kjo do të thotë se lidhjet e tyre janë më të qëndrueshme dhe autentike.

Një këndvështrim i ri mbi vetminë

Ndryshe nga perceptimi tradicional, studimi tregoi se nuk është introversioni ai që shpjegon dashurinë për vetminë, por autenticiteti dhe autonomia personale janë faktorët kryesorë.

Personat me këto tipare ndihen mirë me veten; kanë identitet të fortë; respektojnë kufijtë e të tjerëve dhe shmangin sjelljet impulsive.

Pse janë më besnikë?

Psikologët shpjegojnë se ata investojnë në marrëdhënie cilësore; nuk qëndrojnë në lidhje nga frika e vetmisë dhe besnikëria për ta është zgjedhje e vetëdijshme, jo një detyrim.

Të qenit mirë me veten nuk është një shenjë izolimi, por një pjekuri emocionale.

Sipas psikologjisë moderne, njerëzit që e vlerësojnë vetminë – shpesh janë ata që krijojnë lidhjet më të forta, më të sinqerta dhe më besnike. /atsh