Pse njerëzit largohen nga marrëdhëniet pa asnjë paralajmërim?

Ndonjëherë, ndarja ndodh pa e parë të vijë dhe pa përgjigje. Por pse ndodh kjo?

Ka disa arsye të mundshme pse partneri ose partnerja mund të largohet papritur nga marrëdhënia.

Ja disa nga shkaqet që mund të jenë pas këtij fundi:

1. Mungesa e sinjaleve të qarta

Marrëdhënia mund të jetë përkeqësuar prej kohësh dhe ti thjesht nuk e ke kuptuar. Është e mundur që ka pasur sinjale të cilat i ke injoruar pa dashje, si mungesa e komunikimit, përpjekjet për të diskutuar gjëra serioze ose shenja që personi tjetër po largohej emocionalisht.

Kjo mungesë vëmendjeje të ka bërë që ta perceptosh ndarjen si të papritur edhe pse ajo ka qenë në proces për një kohë të gjatë.

2. Ti ke bërë diçka të pafalshme

Ndonjëherë, faji mund të jetë edhe tek ti. Nëse ke tradhtuar ose ke zhgënjyer thellë partnerin në një moment të vështirë për të, atëherë largimi mund të ketë qenë një akt mbrojtjeje për veten.

Gjëra të rënda si tradhtia, lënia pas dore e marrëdhënies ose zhgënjimet e përsëritura mund ta shtyjnë dikë të largohet pa shumë fjalë.

3. Partneri nuk kishte krijuar një lidhje të vërtetë emocionale

Disa njerëz janë aktorë të mirë në marrëdhënie. Ata mund të duken të dashuruar, të përkushtuar dhe të ndjeshëm, por në të vërtetë, nuk kanë krijuar kurrë një lidhje të thellë emocionale.

Këta njerëz janë të prirur të largohen sapo marrëdhënia nuk plotëson më nevojat e tyre sipërfaqësore. Për ta, është më e lehtë të dalin nga jeta jote pa shumë përpjekje sepse nuk kanë qenë kurrë të lidhur vërtet me ty.

4. Marrëdhënia ishte e njëanshme

Nëse marrëdhënia ishte e ndërtuar mbi nevojat dhe dëshirat e një personi, atëherë largimi i tij mund të vijë kur ti ke filluar të kërkosh diçka në këmbim.

Njerëzit narcisistë janë të prirur të të shfrytëzojnë deri në momentin kur kërkesat e tua fillojnë t’i ngarkojnë ata emocionalisht. Në këtë rast, partneri mund të largohet duke kërkuar dikë tjetër që t’i përmbushë nevojat e tij, pa detyrime të ndërsjella.

5. Varësia nga diçka që ti nuk mund t’ua ofroje më

Shpesh, një marrëdhënie mund të ndërtohet mbi nevojat specifike të një personi për një status të caktuar emocional, shoqëror, fizik ose financiar që ti i ofroje. Nëse ke qenë figura që i ofronte siguri, sukses social ose edhe thjesht diçka emocionale, atëherë, kur këto të fundit fillojnë të mungojnë, partneri mund të largohet për të gjetur një “furnizues” të ri. Nëse humbet punën, ndryshon pamjen ose kalon një krizë personale, ai ose ajo mund të mos jetë më aty për ty sepse marrëdhënia është ndërtuar mbi përfitime që nuk ekzistojnë më.

Kur një marrëdhënie mbyllet pa paralajmërim, mund të jetë lënduese, por duke kuptuar disa nga arsyet e mundshme pas këtij largimi, mund të fillosh të shërohesh më lehtë dhe të kuptosh se ndonjëherë, ndarjet nuk janë aq të papritura sa duken. /telegrafi