Zbulohen disa nga notat më të hershme muzikore në Pensilvani
Hulumtues në Pensilvani kanë zbuluar atë që mendojnë se janë disa nga notat më të hershme të shkruara në historinë muzikore perëndimore, në një dorëshkrim të shekullit të IX-të, i cili, sipas tyre, kishte qëndruar “i fshehur në sy të gjithkujt” për vite me radhë në duart e një koleksionisti privat, sipas “The Guardian”.
Shënime, karaktere dhe pika të ngjashme me shkurtime të shkurtra, shfaqen mbi fjalën “allelua” në dokumentin e gjetur, një fletë e një sakramenti latin, një libër liturgjik katolik përdorur në Evropën perëndimore gjatë meshës që mendohet se i përket fundit të viteve 800.
Ndërsa forma më të hershme të shkrimit të muzikës ekzistojnë, veçanërisht “Himni për Nikkal”, i gdhendur në pllaka balte që datojnë nga 1400–1200 p.e.s, shënimet e sakramentit janë ndër të parat të njohura që tregojnë lindjen e muzikës moderne perëndimore, sipas studiuesve.
Ato u zbuluan nga historiani dhe autori Nathan Raab, president i “Raab Collection”, gjatë vlerësimit të dokumentit që i ishte paraqitur nga pronari privat.
Raab beson se shënimet më parë janë anashkaluar ose keqkuptuar, dhe tha se ka kaluar muaj duke studiuar origjinën dhe rëndësinë e tyre.
“Kjo është një dëshmi jashtëzakonisht e hershme e përdorimit tonë modern të shënimeve muzikore në fillimet e saj, dhe zbulimi i saj është një kujtesë e mëtejshme për ne në fushën e zbulimeve historike që ndonjëherë ato zbulime fshihen në sy të të gjithëve”, tha ai.
Dokumenti është krijuar ndoshta në Gjermani në gjysmën e dytë të shekullit të IX-të, tha Raab, dhe teksti është për shërbimet e Pashkëve. Shënimet muzikore, infleksionet dhe aksentet mbi fjalët përfaqësojnë udhëzime për ngritjen dhe uljen e tonit, “si ndihmë vizuale për këngëtarin”.
Shembujt më të hershëm të ruajtur të shënimeve muzikore në muzikën perëndimore janë dorëshkrimi i Laon Gradual, një kantë gregoriane, i ruajtur në bibliotekën komunale në Laon, Francë, dhe Cantatorium i Shën Gall në bibliotekën e abacisë në Saint Gallen, Zvicër, të dy anë fund të shekullit të IX-të ose fillim të shekullit të X-të.
Raab tha se dokumenti mesjetar në posedimin e tij, me vlerë 80 000 dollarë, mund të jetë edhe më i vjetër. Nuk njihet asnjë dokument më i hershëm në ndonjë koleksion privat ose që ka arritur në tregun privat, tha ai.
“Ndërsa muzika ka qenë një konstantë e kulturës njerëzore, forma e saj e shkruar nuk ka qenë,” thuhet në një njoftim për shtyp që shpall zbulimin.
“Kjo fletë qëndron ndër dëshmitë më të hershme për shënimin e muzikës në perëndim, së bashku me Laon Gradual dhe St Gall Cantatorium në datimin e saj më të hershëm të mundshëm”./rtsh
