Studiuesit publikojnë një hartë të trurit që tregon se si merren vendimet

Një arritje historike në neuroshkencë është bërë me publikimin e një hartë të re të trurit që tregon aktivitetin nervor gjatë procesit të vendimmarrjes. Kjo hartë, e krijuar nga një partneritet ndërkombëtar me 22 laboratorë, ofron pamjen më të plotë të aktivitetit të trurit të regjistruar ndonjëherë.

Sipas studimeve të botuara në revistën Nature, të dhënat e mbledhura nga 139 minj zbulojnë se vendimmarrja nuk aktivizon vetëm disa zona të trurit, siç mendohej më parë, por përfshin një rrjet të gjerë neuronesh në pothuajse 95% të trurit të miut. Ky zbulim madhor, i cili kërkoi shtatë vjet punë, kalon nga studimi i disa qindra neuroneve në disa qindra mijëra, falë zhvillimit të teknologjisë së re të quajtur Neuropixels.

Harta e re e trurit ka nxjerrë dy rezultate kryesore:

Një shpërndarje e gjerë e aktivitetit elektrik që lidhet me vendimmarrjen, duke treguar se procesi është shumë më kompleks dhe i përfshirë se sa mendohej më parë.

Si pritjet formësojnë zgjedhjet. Studimet tregojnë se truri përdor njohuri paraprake për të përpunuar informacionin shqisor, duke ndikuar drejtpërdrejt në vendimet që marrim.

Ky bashkëpunim i gjerë, i krahasuar me “Sloan Digital Sky Survey për trurin”, synon të revolucionarizojë mënyrën se si studiohet truri dhe të frymëzojë kërkime të mëtejshme në shkallë të gjerë. Kjo hartë e re jo vetëm që ndryshon kuptimin tonë për funksionimin e trurit, por gjithashtu hap dyer të reja për studime më të synuara mbi sjelljen komplekse dhe proceset njohëse./rtsh