Ky është shqiptari që për 20 vjet i pilotoi avionët ushtarak në ish-Jugosllavi [video]

Mënyrën se si drejtohet një aeroplan, e di fortë mirë.

Por, aeroplanët që i pilotoi Ramadan Sadikaj, ishin të një natyre krejt tjetër.

Për afër 20 vjet, Sadikaj ishte pilot i aeroplanëve ushtarak në ish-Jogusllavi.

Gjithçka nisi në vitet e 70-ta, kur Ramadan Sadikaj, e përfundoi shkollën fillore.

Kureshtjen e kam pas qatë kureshtje, sepse prej ku lindke një aeroplan në horizont derisa perëndojke, e përcjellsha dhe e shikojsha tërë kohën.

Një arsimtar i shkollës fillore erdhi me konkurs, me caktoi mua dhe dy tjerë, tha keni me shku në konkursin për pilot, thashë çka bre?”, tregon Sadikaj për Tëvë 1.

Në këtë formë, Ramadan Sadikaj gjithë shpresat për ta ndjekur ëndrrën, i vendosi në konkursin për pilot të një gjimnazi ushtarak.

Por kjo shkollë, ndodhej qindra kilometra larg vendlindjes.

“Pas disa ditëve më ka ardh një letër që jam pranuar me vazhdu shkollimin në Mostar, një qytet në Bosnje për pilot”, thotë Sadikaj.

Pas 4 vjetëve shkollim të mesëm në Mostar, Sadikaj u pranua edhe në akademinë ushtarake në Zarë të Kroacisë.

“Aty viti i parë ka qenë kryesisht teorik, ka pas shumë teori, shumë lëndë shumë mësim. Pasi u krye viti i parë, fillofshim fluturimeve”, shprehet ai.

Dita kur, Sadikaj do të ulej i vetëm në kabinën e avionit ushtarak, erdhi vetëm pas 5 viteve.

E përjetimet e asaj date, ish-piloti shqiptar thotë se nuk do ti harrojë kurrë.

“Ky ka qenë dita më e lumtur në jetën, që kam arrit pas sa viteve dhe pas gjithë asaj pune, me fluturua i vetëm..”, tregon Sadikaj.

Ramadan Sadikaj në luftën e Kosovës, nuk pati mundësi ta pilotonte një avion ushtarak.

Por ky iu bashkua Brigadës 133 “Ardian Krasniqi”, ku u caktua si komandant njësiti.

Ai  ka treguar se si u ndje, ditën kur pilotët e NATO-s, filluan bombardimet mbi shtetin serb.

“Unë kam menduar që jam i duhur, se i kam ditë caqet serbe. Gjithë kam thënë ah sikur unë të kisha pas mundësi t’iu tregoja atyre (NATO-s) se ku janë bunkerat, ku i kanë raketet, por, ata i kishin ditë më mirë se unë”, thotë Sadikaj.

Ramadan Sadikaj ishte vetëm piloti i dytë shqiptar nga Kosova që kreu Akademinë e Aviacionit Ushtarake në Zarë.

Më herët këtë e bëri Ali Aliu.