“Etno Fest” fillon më 10 korrik në fshatin Kukaj
Festivali “Etno Fest” këtë vit do të zhvillohet nga 10 deri më 20 korrik 2025 në fshatin Kukaj, duke ofruar një sërë aktivitetesh kulturore të pasura dhe të larmishme.
"Edicioni i 15-të i këtij festivali vjen me temën “Identiteti” – një udhëtim i thellë drejt rrënjëve tona, ndaj asaj që jemi dhe çfarë kemi trashëguar. Ky edicion do të fillojë me performancën e Malda Susurit dhe do të vazhdojë me shumë grupe të tjera kombëtare dhe ndërkombëtare, si Grupi Rilindja, Jericho, Sarakasi Trust nga Kenia, një trupë akrobatësh, valltarësh dhe artistësh që sjellin ritmin dhe energjinë unike të Afrikës, Florent Abrash, Vjollca Robelli etj", thuhet në njoftim.
Ekspozita “KRUSHA IME” nga Mercedes Pereira është një homazh për gratë e Krushës – të mbijetuara të luftës, simbol i forcës dhe guximit, që hapet në kuadër të festivalit, pastaj Blerta Syla Surroi paraqitet me ekspozitën e qeramikës “Rrëfime Peshqish”, skulptori Gëzim Muriqi me “Ridimensionime” etj.
Nga tingujt autoktonë, artizanati, ushqimi tradicional, shfaqjet, ekspozitat e deri te rrëfimet që mbajnë gjallë shpirtin e një kombi – Etno Fest është vendi ku kultura jehon.
