Përmbyllet manifestimi tradicional “Ditët e Agimit 2025”
Kanë vazhduar aktivitetet e manifestimit tradicional kulturor “Ditët e Agimit 2025”, nën përkujdesjen e kryetarit të Komunës së Gjilanit, Alban Hysenit dhe Shoqatës Kulturore “Ditët e Agimit” në Zhegër.
Në njoftimin e komunës bëhet me dije se në shënimin e ditëlindjes së Agim Ramadanit, në tubimin qendror – “I këndojmë Agimit”, bashkë me kryetarin e komunës së Gjilanit, Alban Hyseni, ishte edhe kryeministri në detyrë i Kosovës, Albin Kurti.
Hyseni tha se manifestimi “I këndojmë Agimit” ishte një aktivitet i veçantë në kuadër të manifestimit “Ditët e Agimit 2025”, ku përmes këngës e fjalës nderuan jetën dhe veprën e heroit Agim Ramadani.
“Në Zhegër kujtuam jetën dhe veprën e heroit Agim Ramadani përmes këngës, poezisë dhe artit, në praninë e qytetarëve, artistëve dhe mysafirëve të shumtë – ndër ta edhe kryeministri në detyrë i Kosovës, Albin Kurti. Lavdi komandant ‘Katanës’ dhe të gjithë dëshmorëve të lirisë!”, ka thënë ai, thuhet në njoftim.
I pari i Gjilanit njoftoi se manifestimin “Ditët e Agimit 2025” e përmbyllën me aktivitetin e mbajtur në pendën e Livoçit ku, përveç përfaqësuesve nga e gjithë Kosova, morën pjesë edhe peshkatarë nga Shqipëria, duke e kthyer këtë ngjarje në një manifestim mbarëkombëtar.
Sipas tij, “pjesëmarrja dhe angazhimi i peshkatarëve në këtë aktivitet përkujtimor është një dëshmi e fuqishme e bashkimit tonë rreth vlerave të përbashkëta dhe respektit të thellë për historinë dhe sakrificën e të rënëve”.
Ndërsa Kurti për heroin Agim Ramadani tha se është ndër dëshmorët e rënë në luftën çlirimtare të popullit shqiptar për lirinë dhe pavarësinë e Kosovës, teksa shtoi se dëshmorët e kombit nuk janë të përjetësuar në kujtesën tonë kolektive dhe në historinë e Kosovës vetëm për shkak të aktit të tyre të rënies, por edhe për aktivitetet e tyre sa ishin gjallë, angazhimit dhe veprës së tyre në totalitetin e saj.
“Agim Ramadani është me profilin më të gjithanshëm: trashëgimia ushtarake, politike dhe artistike e të cilit vazhdon ende të na befasojë, teksa shohim fotografitë, poezitë, pikturat dhe dorëshkrimet e tij. Agim Ramadani ishte pra, poet, piktor, aktivist politik, strateg ushtarak, si dhe një patriot me shpirt artisti e fort frymëzues edhe për gjeneratat e sotme sikurse për shoqërinë e tij dikur”, tha ai, thuhet tutje në njoftim.
Kurti shtoi se të tilla manifestime ua zgjasin jetën kujtimeve me nderime dhe mirënjohje jetës së dëshmorëve të lirisë dhe i forcojnë lidhjet e këtyre kujtimeve nga njëri brez në tjetrin.
“Sepse duke i kujtuar dëshmorët mes të gjallësh se si ishin ata, sa ishin të gjallë, i mbajmë të gjalla kujtimet tona për ta dhe shembullin e tyre për ne. Ju dëshiroj një pasdite çlodhëse dhe një mbrëmje të këndshme sonte, në këto ditë të hershme të pranverës së sivjetme, dhe ju përgëzoj për mirëmbajtjen e manifestimeve ‘Ditët e Agimit’. Lavdi ‘Katanës’, heroit Agim Ramadani, bashkë me dëshmorët dhe martirët e kombit të rënë për lirinë e Kosovës!”, tha Kurti.
