Filmi danez ku aktori shqiptar Besir Zeqiri luan rolin kryesor, nominohet për “Oscars 2025”

Filmi danez “The Girl with the Needle”, një dramë e fuqishme e regjisorit Magnus von Horn, është nominuar për Oscars 2025 si hyrja zyrtare e Danimarkës në kategorinë e Filmit më të mirë ndërkombëtar. Rolin kryesor në këtë film të veçantë e interpreton aktori shqiptar Besir Zeqiri, i cili sjell një performancë mbresëlënëse që ka tërhequr vëmendjen e kritikëve ndërkombëtarë.

Ngjarja zhvillohet në Kopenhagën e vitit 1919, ku një punëtore e re, e papunë dhe shtatzënë, përballet me një të ardhme të pasigurt. Ajo takon Dagmarin, një grua që drejton një agjenci të fshehtë për birësime. Një lidhje e fortë krijohet mes tyre, por gjithçka shkatërrohet kur protagonistja zbulon një të vërtetë tronditëse për aktivitetet e Dagmarit. Ky udhëtim emocional është përshkuar nga një skenar i fuqishëm dhe performanca bindëse e aktorit kryesor, Besir Zeqiri.

I lindur në Kopenhagë me trashëgimi shqiptare, Besir Zeqiri përfaqëson një valë të re diversiteti në kinematografinë skandinave. Fillimisht, ai kishte menduar të ndiqte një karrierë në forcat e policisë, por pasioni për artin e skenës e devijoi drejt aktrimit kur iu bashkua një kompanie teatrore në vitin 2009.

Prej atëherë, karriera e tij ka njohur një ngritje të jashtëzakonshme. Roli kryesor në “The Girl with the Needle” (2024) është kulmi i suksesit të tij deri më tani. Ky film, i cili pati premierën në Festivalin e Kanës, ka marrë vlerësime të larta dhe është përzgjedhur si kandidatura zyrtare e Danimarkës për Oscars.

Zeqiri ka shkëlqyer edhe në projekte të tjera, si “Way Home” (2024) dhe “Outlaw” (2021), me të cilin fitoi çmimin prestigjioz Robert, dhënë nga Akademia Daneze e Filmit. Në vitin 2025, ai është përzgjedhur si një nga aktorët më premtues në programin prestigjioz European Film Promotion – Shooting Stars.

Në këtë dramë historike, Besir Zeciri sjell një ndjeshmëri të veçantë dhe një forcë emocionale që e bën personazhin e tij qendror të paharrueshëm. Performanca e tij ka fituar zemrat e audiencës dhe të kritikëve, duke e vendosur atë si një nga talentet më të rëndësishme të momentit në kinematografinë ndërkombëtare.

Përfshirja e Besir Zecirit në një film të nominuar për Oscars është një moment krenarie për komunitetin shqiptar. Ai është dëshmi e aftësisë dhe talentit shqiptar në skenën ndërkombëtare dhe një shembull frymëzues për artistët e rinj.

Shumë sy janë tani të drejtuar drejt Oscars, ku “The Girl with the Needle” dhe Besir Zeciri shpresojnë të sjellin një tjetër moment historik për kinemanë daneze dhe atë shqiptare. /telegrafi