![Gërmimet arkeologjike në Cernicë të Gjilanit, çojnë drejt zbulimeve të reja historike në Kosovë](/uploads/zeri.info/images/2024/July/15/auto_zbulime-arkeologjike-780x4391721067032.jpg)
Gërmimet arkeologjike në Cernicë të Gjilanit, çojnë drejt zbulimeve të reja historike në Kosovë
Arkeologët kanë nisur gërmimet në lokalitetin arkeologjik në Cernicë të Gjilanit, duke premtuar zbulime të reja dhe të rëndësishme.
Ministri i Turizmit, Hajrulla Çeku përmes një postimi në Facebook thotë se Gradina e Cernicës po konsiderohet një nga vendbanimet e periudhës së hekurit dhe asaj helenistike, që përfshinë periudhën e Mbretërisë Dardane, është tani në qendër të vëmendjes.
Çeku ka theksuar se arkeologjia po trajtohet me prioritet në Kosovë.
“Gradina e Cernicës, bazuar në materialin e zbuluar arkeologjik, përfaqëson njërin nga vendbanimet kryesore të periudhës së hekurit dhe asaj helenistike – periudha e Mbretërisë Dardane, në territorin e Republikës së Kosovës”, ka shkruar Çeku.
Kjo iniciativë është pjesë e përpjekjeve të vazhdueshme për të eksploruar dhe ruajtur vendbanimet e lashta që dëshmojnë historinë dhe kulturën e pasur të Kosovës.
Gërmimet arkeologjike në Gradina e Cernicës pritet të ofrojnë njohuri të reja dhe të zgjojnë interes të madh si për komunitetin shkencor ashtu edhe për publikun e gjerë.
Gërmimet në Cernicë janë vetëm vazhdimi i një serie projektesh që synojnë të ndriçojnë më tej historinë e lashtë të Kosovës.
Ndryshe, punimet për pastrimin dhe konservimin e kalasë së Vuçakut kanë filluar në maj, por para pak ditësh edhe aty është zbuluar një objekt i vjetër romak me gdhendje skulpturale.
Në muret rrethuese të kalasë, është zbuluar një altar romak që daton nga shekulli i tretë i erës sonë, një spolia e ripërdorur në ndërtimin e kalasë së periudhës së Justinianit 527–565 para erës sonë.
Për këtë, kryeministri i Kosovës, Albin Kurti, e vlerësoi zbulimin si një dëshmi të rëndësishme të historisë dhe kulturës së vazhdueshme të Kosovës.
“Gërmimet sapo kanë filluar në Kalanë e Vuçakut të Drenasit, dhe ekipi arkeologjik tashmë ka bërë zbulimin e tij të parë të rëndësishëm, në muret rrethuese të kalasë: një altar romak që daton nga shekulli i tretë të e.s., një spolia e ripërdorur në ndërtimin e kalasë së periudhës së Justinianit (527–565 e.s.). Altari ka një rëndësi të veçantë si dëshmi e jetës dhe kulturës së vazhdueshme nga parahistoria dhe antikiteti deri në mesjetë”, ka shkruar Kurti në platformën X.
Me këto zbulime, Kosova po konsolidon pozicionin e saj si një vend me trashëgimi të pasur arkeologjike dhe historike.