![Ejupi: S’harrohesh o Agim Doçi, se vargu i “Marshit të UÇK-së” do të jehojë sa të jetojnë shqiptarët!](/uploads/zeri.info/images/2024/June/24/auto_remza1719228755.jpg)
Ejupi: S’harrohesh o Agim Doçi, se vargu i “Marshit të UÇK-së” do të jehojë sa të jetojnë shqiptarët!
Sipërmarrësi Remzi Ejupi ka reaguar pas vdekjes së poetit, Agim Doçi.
Ai, përmes një postimi në profilin e tij zyrtar në rrjetin social Facebook, ka shkruar se Agim Doçi do të mbetet i paharruar për shqiptarët, e në veçanti ata të Kosovës, përcjell Zeri.info.
Përmes këtij shkrimi, Ejupi ka shprehur indinjatën e tij se Agim Doçi nuk është vlerësuar aq sa duhet.
Duke kujtuar disa nga tekstet e Doçit të disa këngëve, Ejupi ka thënë se sa të ketë shqiptarë, Agim Doçi nuk do të vdesë kurrë.
Reagimi i plotë i Ejupit, pa ndërhyrje:
Gim!
Llapjani jam, ai Remziu që bashkë bëmë "Homazh për Kosovën" anë e mbanë Evropës, në përkrahjen e ushtarëve, maleve të Kosovës!
Të njoha qendrestar, t'pa epur, kurrë të heshtur, mendje ndritur e fjalë pak që të zunë vend në çdo kuvend!
Sigurisht se nuk të vlersuem sa duhet e si duhet e kur duhet!
Nuk qëndruam mbas fjalëve tua "shigjetuese" për t'pamirat, t'pa larat, për t'pa diturit që u bënë të ditur me monetën e gjelbërt!
Është dashur të ta ndihmojmë edhe më shumë vargun tënd "A vritet pafajsia", por ja që nganjëherë jemi të vonuar e bëhemi herak vetëm kur njerëzit kapërcejnë ylberin!
Mbetësh përjetësisht miku im dhe i familjes sime! Përjetësisht dashamirësi me palcë e asht i Kosovës! Mirditori që jetoi për atdheun, ngritur në vargun e këngës!
S'harrohesh o Agim Doçi se vargu i "Marshit të UÇK-së do t'jehojë sa do t'jetojnë shqiptarët!
Pusho n'paqe mik e atdhetar!
Zoti të shpërbleftë me parajsë.