Kurti lavdëron autorët e librit “Lufta e Kosovës 1997-1999: Një bibliografi e përzgjedhur”
Kryeministri i vendit Kurti merr pjesë në promovimin e librit “Lufta e Kosovës 1997-1999: Një bibliografi e përzgjedhur”. Foto: ZKM
Kryeministri i Republikës së Kosovës, Albin Kurti, mori pjesë në promovimin e librit “Lufta e Kosovës 1997-1999: Një bibliografi e përzgjedhur”, të autorëve Durim Abdullahu dhe Davjol Ndoja, e mbajtur në Bibliotekën Kombëtare të Kosovës.
Në fjalën e tij, i pari i qeverisë tha se që nga koha e luftës në Kosovë e deri sot, janë shkruar shumë libra për luftën e Kosovës, por ky është libri i parë i shkruar për librat për luftën e Kosovës.
Në këtë libër janë evidentuar plot 7,700 libra për luftën e Kosovës. Dhe kjo shifër kaq e madhe, u shpreh kryeministri Kurti na bën edhe më shumë të reflektojmë pasi vetëm 600 libra prej të gjithë këtyre librave janë shkruar nga autorë shqiptarë, që do të thotë se pjesa tjetër, mbi 7,000 libra janë shkruar nga autorët ndërkombëtarë.
Nga gjithsej 7,700 libra për luftën e Kosovës, disa edhe përkthyer në 28 gjuhë të ndryshme.
Autorët, Abdullahu dhe Ndoja i kanë identifikuar dhe regjistruar ata duke i nxjerrë prej 45 bibliotekave kryesisht kombëtare, nga 43 shtete të ndryshme, anë e mbanë globit.
Nga zyra e kryeministrit njoftojnë se Kurti i uroi të dy autorët për këtë ndërmarrje të finalizuar me këtë libër të jashtëzakonshëm, dhe tha se beson fuqishëm që sikur në këtë rast, kur një studiues nga Prishtina dhe një studiuese nga Tirana i bëjnë forcat bashkë, rezultati janë veprat e tilla të mëdha dhe të dobishme, për shoqërinë dhe shtetin, për kombin dhe të ardhmen.
