Arti i Shuk Oranit në 'TriBeCa' të Nju Jorkut
Vetëm pak kohë më parë “Wall Street Journal” shkruante për një skenë të re të artit bashkëkohor në Lower Manhattan. Nëse para 40 vjetëve SoHo ishte “Hot Spot”-i i ri artistik, tash po paraqiten gjithnjë më shumë iniciativa të tilla në “TriBeCa”.
Kështu për fillimin e kohës verore atje po hapet ekspozita “Equinox”, në “7 Franklin Place”, e kuruar nga Shane Townley, Cathy Condon dhe Alekjandro Don nga “New York Art Foundation”. Në këtë ekspozitë prezantohen vepra të zgjedhura të artistëve multimedialë, në mesin e të cilëve dhe Shuk Orani, Evan Sebastian Lagache, Alou Dia, Kevin Champeny, Patti Samper dhe Katerina Ganchak.
Këta artistë në pozicionet e tyre eksperimentojnë me koncepte dhe tema që lidhen me rilindjen dhe ripërtëritjen, duke drejtuar me këtë rast vëmendjen nga potenciali i artit, që t’u shërbejë njerëzve në ciklet e tyre të ndryshme jetësore, si burim relaksues dhe rigjenerues. Ekspozita do të hapet për vizita nga 4 deri më 29 prill 2019, nga e hëna deri të dielën, nga ora 12:00 deri në orën 17:00.
Artisti nga Kosova Shuk Orani jeton që prej vitit 1995 si një artist i pavarur në Gjermani (Hamburg). Në punën e tij ai fokusohet në kompleksitetin e qenies njerëzore dhe progresin njerëzor, që është thelbësor për artin të cilin ai krijon. Përmes stilit abstrakt dhe neoekspresionist pikturat e tij janë të gjalla, impulsive, dinamike dhe të përcjellin një përshtypje unike. Gjatë vrojtimit nga afër të pikturave të tij bëhet e qartë se çdo pikturë e Shuk Oranit nga brendia e saj të propozon një strukturë imagjinare. Përveç pikturës, artistit shprehet edhe në mediet e tjera si fotografi, art digjital dhe skulpturë. Një përzgjedhje e gjerë e veprave të tij mund të shihet në ekspozita anembanë botës. Prej ekspozitave në vendlindjen e tij në Prishtinë deri te ekspozitat në institucionet prestigjioze, të tilla si Muzeu i Artit Bashkëkohor në Pekin e deri në Muzeun e Luvrit në Paris. Veprat e tij janë të përfaqësuara gjithashtu në koleksione private dhe publike në mbarë botën.
Në veprat e tij me format të madh midis të tjerash zbulon ngjyrën blu të pasur, që është shpeshherë e mbuluar nga ngjyra e bardhë. Në pikturat e tij ngjyrat e ndryshme janë të ndërthurura dhe të mbivendosura, që të arrijnë dhe të ofrojnë për vështruesin një strukturë krejtësisht të re imagjinare. Abstraksioni dhe ngjyrat e lira i kthejnë pikturat në koncepte vizuale, që përçojnë të pakapërcyeshmen dhe të pafundmen, duke ua dhuruar pikturave një karakter të shenjtë. Por edhe pa këtë sfond tejet të pasur kompozimet e mëdha të magjepsin me ndjeshmërinë e tyre.
