'Peer Gynti nga Kosova' me dy shfaqje në festivalin 'Schöne Aussicht'

Shfaqja “Peer Gynti nga Kosova” e autorit Jeton Neziraj dhe me regji të Agon Myftarit, do të jetë pjesë e Festivalit “Schöne Aussicht“”që organizohet nga teatri “Junges Ensemble”, në Stuttgart të Gjermanisë. “Peer Gynti nga Kosova” do të shfaqet me 9 dhe 10 maj në Theater Rampe.

“Schöne Aussicht” është njëri nga festivalet më prestigjioze të Teatrit në Gjermani. Ai ka karakter ndërkombëtar dhe sivjet, pos shfaqjes nga Kosova, do të prezantohen edhe dhjetëra shfaqje nga Gjermania dhe vende të ndryshme të botës.

“Peer Gynti nga Kosova” është prodhuar nga Qendra Multimedia dhe ka pasur premierën në maj të vitit të kaluar. Në këtë shfaqje luajnë aktorët: Bujar Ahmeti, Donikë Ahmeti, Shpëtim Selmani dhe Tristan Halilaj.

Skenografinë e shfaqjes e ka punuar nga Nicola Minssen, kostumet nga Yllka Brada, kurse kompozimin muzikor Gabriele Marangoni. Dramaturg i shfaqjes ka qenë Stefan Schletter. 

“Peer Gynti nga Kosova” është rrëfim për një ëndërr të dështuar. I udhëhequr nga një shpresë e thjeshtë për jetë më të mirë dhe për të gjetur lumturinë, Peeri i ri, para luftës në Kosovë, niset për të kërkuar të ardhmen në ‘parajsën’ e quajtur Evropë. Ajo çka ndodhë me këtë të ri gjatë këtij udhëtimi reflekton eksperiencat e shumë desperadove të rinj, të cilët çdo vit, të mbushur me shpresë, lëshojnë atdheun e tyre. Shpesh, në atdheun e tyre të ri, të keqtrajtuar nga autoritetet, të izoluar dhe larg nga shtëpia, me mungesë perspektive dhe të mospërfshirjes në shoqëri, atyre ëndrra u bëhet një makth i madh.

Në dëshirën e tyre për t’u pranuar ata shpesh bien viktima të shokëve të këqij, të cilët ua ofrojnë “sigurinë e munguar”. Peer, personazhi kryesor i kësaj drame, e gjen veten të respektuar në një grup shqiptarësh, të cilët ia tregojnë atij shkathtësitë kriminale dhe i garantojnë siguri. Megjithatë, pavarësisht kësaj, ai shpejt bie në burg. Gjatë kësaj periudhe në burg, gradualisht fillon procesi i radikalizmit. Religjioni i jep atij kurajë, kuptim në jetë dhe ia forcon vetëbesimin. Këtu drama merret me një problem aktual në shoqëritë tona – radikalizimin religjioz të të rinjve në burgje. Shumë nga këta të ashtuquajtur ‘luftëtarë të shenjtë’ nga Evropa, të cilët luftojnë në Siri, janë radikalizuar në burgje.

Por pavarësisht seriozitetit të temës, shfaqja asnjëherë nuk bëhet patetike apo didaktike. Në fund, publiku e lë shfaqjen jo vetëm i merakosur dhe kuptimplotë, por edhe i argëtuar në mënyrë perfekte.

“Publiku në shfaqje e ndjenë që ky Peer Gynt modern jo vetëm se dëshiron të tregojë një rrëfim autentik, por edhe të tregojë një rrëfim të vërtetë, si shembull për krejt shpresat për liri, për lumturinë dhe prosperitetin në Evropën e tanishme. Dhe për dëshpërimin", ka shkruar Frankfurter Allgemeine Zeitung.

Qendra Multimedia mbështetet nga Zyra e Bashkimit Evropian në Kosovë. Ajo është themeluar në vitin 2002 në Kosovë dhe është organizatë e pavarur kulturore e fokusuar në prodhimtari artistike, shkëmbime kulturore ndërkombëtare e publikime nga fusha artit dhe kulturës. Fokusi kryesor i saj qëndron në dramaturgjinë dhe teatrin bashkëkohor. Qendra prodhon dhe bashkëprodhon aktivitete kulturore për të gjitha moshat dhe aktivitetet e saj kanë shtrirje ndërkombëtare. Shkëmbimet artistike me partnerë ndërkombëtarë janë një element kyç në punën e Qendrës Multimedia.

Qendra është themeluar nga një grup i artistëve të rijn, të cilët kanë synuar që të krijojnë një format alternativ të prodhimtarisë artistike, të influencojnë politikat kulturore si dhe të përdorin artin për të adresuar çështje të ndjeshme politike e sociale.

Nga viti 2002 Qendra Multimedia ka organizuar dhe fascilituar mbi 100 projekte artistike, në Kosovë, por edhe në vende të tjera në Evropë, Azi dhe Afrikë. Disa nga projektet kryesore afatgjate që i kemi inicuar vetë apo në bashkëpunim me partnerët tanë janë: Festivali Ndërkombëtar i Letërsisë polip; Teatri i Forumit në Kosovë; Politikat e Reja të Solidaritetit; Historia e Kosovës; Play for All; Balcan Can Contemporary; Programi i rezidencës për shkrimtarë “Prishtina nuk ka lumë”, etj.