E rrëmbyen dhe e rrahën një person në Prizren, arrestohen tre persona
Një rast i privimit të kundërligjshëm nga liria është raportuar më 24 janar 2026 në Prizren.
Sipas raportit ditor të Policisë, katër persona të dyshuar, fillimisht të panjohur, dyshohet se me forcë e kanë futur një burrë në një veturë të tipit “Seat” me targa vendore, duke e marrë kundër vullnetit të tij.
Ngjarja dyshohet se ka ndodhur pasi viktima kishte pasur më herët kontakt në rrjetet sociale me një vajzë, e cila dyshohet të jetë nga Peja. Pas rreth një ore mbajtjeje, të dyshuarit e kanë liruar viktimën, e cila kishte pësuar lëndime të dukshme trupore.
Viktimës i është ofruar tretman mjekësor, ndërsa njësitet policore kanë nisur menjëherë hetimet lidhur me rastin. Si rezultat i veprimeve policore, janë arrestuar katër të dyshuar, ku njëri prej tyre është i mitur.
Gjatë arrestimit, policia ka sekuestruar si prova materiale veturën që dyshohet se është përdorur në rast, katër telefona mobilë dhe një elektroshok. Pas intervistimit dhe me vendim të prokurorit, tre nga të dyshuarit janë dërguar në mbajtje, ndërsa i dyshuari i mitur është liruar dhe rasti ndaj tij do të trajtohet në procedurë të rregullt.
Raporti i plotë i Policisë, pa ndërhyrje:
PRIVIM I KUNDËRLIGJSHËM NGA LIRIA
Piranë, Prizren / 24.01.2026-11:52. Katër persona të dyshuar-të panjohur, dyshohet se me forcë e kanë futur në veturën e tipit Seat (me targa vendore) viktimën mashkull kosovar, pasi që dyshohet se viktima kishte pasur më herët kontakt në rrjetet sociale me një vajzë e cila dyshohet të jetë nga Peja. Të dyshuarit, pas rreth një ore e kanë liruar viktimën i cili kishte pësuar lëndime të dukshme. Viktimës i është ofruar tretman mjekësor, ndërsa njësitet policore janë duke u marrë me rastin. Katër të dyshuarit m/k, njëri i mitur janë arrestuar dhe si provë materiale janë sekuestruar vetura që është përdorur në rast, katër telefona dhe një elektroshok. Pas intervistimit me vendim të prokurorit tre janë dërguar në mbajtje, ndërsa i dyshuari i mitur është liruar në procedurë të rregullt. /Zëri
