Tragjedi në Maqedoni të Veriut, plumbi qorr i merr jetën fëmijës 2-vjeçar
Një ngjarje tragjike ka ndodhur në zonën e Gazibabës në Maqedoni të Veriut, ku një fmijë 2-vjeçar ka vdekur pasi u godit nga një plumb qorr në kokë.
Pavarësisht tentimeve dhe trajtimeve që iu dhanë në Neurokirurgji, fundi ishte fatal, shkruan TV21.mk.
Fëmija qëndroi për 24 orë nën mbikëqyrjen e mjekëve, por siç njoftuan nga Ministria e Shëndetësisë së RMV-së, shkalla e dëmtimit në tru nuk lejoi ndërhyrje kirurgjikale.
“Fëmija u pranua në Qendrën e Urgjencës dhe, për shkak të gjendjes së rëndë shëndetësore, u transferua për trajtim në Klinikën e Neurokirurgjisë, në repartin e kujdesit intensiv. Ai u intubua, u vendos në ventilim mekanik, iu administrua terapi antibiotike dhe antiedematoze, si dhe ishte nën monitorim të vazhdueshëm 24-orësh. Shkalla e dëmtimit të indit trunor nuk lejoi ndërhyrje kirurgjikale. Pavarësisht përpjekjeve maksimale të ekipit mjekësor, përfundimi ishte tragjik”, njoftojnë nga Ministria e Shëndetësisë.
Gjithçka ndodhi kur gjatë ndërrimit të viteve, fëmija bashkë me nënën e vet, para shtëpisë së tyre ishin duke parë spektaklin e krijuar nga hedhja e fishekzjarrëve, kur u qëllua nga një plumb qorr.
