Konfiskohen 40 mijë euro të falsifikuara në Prishtinë, arrestohen dy persona

Me urdhër të Prokurorisë Speciale të Kosovës, në orët e mbrëmjes të së martës janë ndaluar dy persona të dyshuar për veprën penale “Falsifikim i parasë”.

Hetuesit policorë nga Drejtoria për Hetimin e Krimeve Ekonomike dhe Korrupsionit, pas hetimeve disamujore, në bazë të urdhrit të lëshuar nga Gjykata Themelore në Prishtinë dhe nën udhëheqjen e Prokurorisë Speciale të Kosovës, kanë zhvilluar një operacion policor në Prishtinë.

Siç ka njoftuar Prokuroria e Shtetit, në bashkëpunim me Njësinë e Reagimit të Shpejtë të Policisë së Kosovës, është ndaluar një veturë, në të cilën gjendeshin dy personat e dyshuar, S.T. dhe A.Th.

Pas kontrollit të ushtruar janë gjetur dhe sekuestruar para të falsifikuara në valutën euro, në shumën totale prej 40.000.00 eurove, të cilat gjatë testimit fillestar kanë rezultuar se janë të falsifikuara.

“Hetuesit kanë kryer kontrolle edhe në dy lokacione: në shtëpitë dhe objektet përcjellëse të banimit të personave të dyshuar. Prokuroria Speciale e Kosovës, në koordinim me Policinë e Kosovës, është duke i ndërmarrë të gjitha veprimet e nevojshme hetimore në përputhje me dispozitat e Kodit të Procedurës Penale”, thuhet në njoftimin e përbashkët të Prokurorisë dhe Policisë së Kosovës. /Zëri