Policia sekuestron 1 mijë kilogramë speca në Kamenicë në vlerë rreth 3 mijë euro  

Policia e Kosovës ka bërë të ditur se e ka parandaluar një rast të kontrabandimit me mallra, të premten.

Sipas njoftimit të PK-së thuhet se në fshatin Lisockë të Kamenicës është ndaluar një automjet me targa vendore, në të cilin kishte 1 mijë kilogramë speca.

Postimi i plotë:

Në vazhdën e aktiviteteve policore me qëllim të parandalimit të rasteve kriminale por edhe të dukurive tjera negative, Policia e Kosovës gjegjësisht njësitë patrulluese nga DRPK-Lindje me datën 29.08.2025 kanë parandaluar një rast të kontrabandimit me mallra.

Lidhur me rastin në fshatin Lisockë-Kamenicë, është ndaluar një automjet me targa vendore me drejtues të dyshuarin mashkull kosovar.

Gjatë kontrollit të automjetit janë gjetur nëntëdhjetë e dy (92) pako me speca në sasi totale rreth 1000 kg (me vlerë sipas tregut rreth 2,500 – 3,000 €), për të cilat i dyshuari nuk kishte prezantuar dokumentacion të vlefshëm.

Në lidhje me procedurat e mëtejme është njoftuar prokurori kujdestar me vendim të të cilit inicohet rasti, ndërsa mallrat dorëzohen në pikën doganore kompetente.

Policia e Kosovës mbetet e përkushtuar në parandalimin dhe luftimin e të gjitha formave të krimit dhe falënderon qytetarët për bashkëpunimin e tyre.