Policia në Prizren shqipton gjoba deri 500 euro për drejtuesit e veturave me zhurmues të veçantë

Gjatë kësaj jave njësitet policore të Njësisë Rajonale të Komunikacionit Rrugor në Prizren kanë identifikuar disa automjete të modifikuar të cilave u ishin montuar zhurmues të veçantë.

Sipas një njoftimi bëhet e ditur se fillimisht automjetet janë dërguar për kontroll teknik të jashtëzakonshëm, ato automjete për të cilat  raporti i kontrollit teknik ka vërtetuar se niveli i zhurmës tejkalonte kufijtë e lejuar ligjorë.

“Ndaj pronarëve të automjeteve është kërkuar që të evitohen ndryshimet e pa lejuara dhe ndaj tyre janë shqiptuar gjoba për përdorimin e zhurmuesit të paautorizuar (150 euro), si dhe për prishje të rendit dhe qetësisë publike (500 euro), përveç zhurmave gjoba janë shqiptuar edhe për shkelësit për tejkalim të shpejtësisë, e disa deri 500 euro”, thuhet në njoftim.

Tutje në njoftim thuhet se Policia e Kosovës mbetet e përkushtuar në ruajtjen e rendit publik, sigurisë rrugore dhe qetësisë së qytetarëve.

Përmes bashkëpunimit të ngushtë me komunitetin dhe përdorimit të mjeteve digjitale si aplikacioni “Raporto Policinë”, fuqizohet reagimi i shpejtë dhe parandalimi i shkeljeve.