I riu në Prizren u godit në gjoks me thikë, Prokuroria jep detaje

Prokuroria Themelore në Prizren, përkatësisht Departamenti për Krime të Rënda, ka dhënë detaje lidhur me ngjarjen tragjike që ndodhi dje në lagjen Tusuz të Prizrenit, ku një i ri u ther me mjet të mprehtë në pjesën e gjoksit dhe vdiq pas trajtimit në QKUK.

Sipas Prokurorisë, në vendin e ngjarjes janë kryer bastisje në shtëpinë e të pandehurit në fshatin Zhur, ku janë sekuestruar një brisk patente dhe një veturë “Audi”, që dyshohet se janë përdorur në krim, thuhet në njoftimin për media.

I pandehuri me inicialet E.B. është arrestuar dhe ndaluar për 48 orë me urdhër të prokurorit, i cili brenda afatit ligjor do të parashtrojë kërkesë për paraburgim.

Prokuroria thekson se është duke vazhduar hetimet për zbardhjen e plotë të rrethanave të këtij rasti. /Zëri