Arrestohet një mjek turk në Prishtinë, i konfiskohet botoks në vlerë 150 mijë euro

Një shtetas turk është arrestuar të premten në Prishtinë për “Prodhim dhe shpërndarje e produkteve të dëmshme mjekësore”.

Policia ka bërë të ditur se tek shtetasi turk kanë gjetur një sasi të materialit që përdoret në mjekësi i njohur si botoks, në vlerë rreth 150 mijë euro, transmeton Zeri.info.

Njoftimi i plotë:

Prishtinë 28.03.2025. Njësia Rajonale për Hetimin e Krimeve Ekonomike dhe Korrupsionit në Prishtinë, pas sigurimit të provave ka ndaluar një të dyshuar mashkull shtetas turk, tek i cili kanë gjetur një sasi të materialit që përdoret në mjekësi (botoks). Gjatë kontrollit në shtëpinë e të dyshuarit është gjetur edhe një sasi tjetër e materialit të njëjtë që është sekuestruar nga Inspektorët e Ministrisë së Shëndetësisë. Vlera totale e materialit të sekuestruar sipas çmimit në treg sillet rreth 150 000 €. Në cilësi të provave materiale nga i dyshuari janë sekuestruar edhe 11 160€ para kesh. Në konsultim me prokurorin i dyshuari pas intervistimit është dërguar në mbajtje.