Arrestohet në Francë 46-vjeçari nga Shijaku, ishte kapur me heroinë dhe pilula metadon
Policia ka bërë të ditur se është arrestuar në Francë shqiptari me iniciale E. B, 46 vjeç, i cili rezulton i dënuar me 5 vite burg në Shqipëri pasi ishte kapur në vitin 2019 duke shitur 5 qese plastike me Heroinë dhe pilula Metadoni.
“Operacioni “Five”, në pranga në Francë, një i dënuar me 5 vjet burgim, për posedim të Heroinës dhe Metadonit.
Si rezultat i sigurimit të informacionit nga strukturat e specializuara të Policisë së Shtetit dhe shkëmbimit të tij, nëpërmjet Interpol Tiranës, me homologët në Paris, u organizua dhe u finalizua operacioni policor ndërkombëtar i koduar “Five”.
Gjatë këtij operacioni, policia franceze lokalizoi, kapi dhe arrestoi me qëllim ekstradimin në Shqipëri, shtetasin E. B, 46 vjeç.
Ai ishte shpallur në kërkim ndërkombëtar sepse në vitin 2021, Gjykata e Rrethit Gjyqësor Tiranë e ka denuar me 5 vjet burgim, për veprën penale “Prodhimi dhe shitja e narkotikëve”.
“Ky shtetas në vitin 2019 ka shitur 5 qese plastike me Heroinë dhe pilula Metadoni. Vijon bashkëpunimi ndërmjet IINTERPOL Tiranës dhe Interpol Parisit, për të finalizuar procedurën e ekstradimit të 46-vjeçarit, në Shqipëri”, njofton policia.
