Ferizaj: Ndëshkohen me gjoba për kundërvajtje në trafik dy shoferë
Policia rajonale e Ferizajt ka shqiptuar dy gjoba kundërvajtëse për dy shoferë, të cilët kanë shkelur rregullat e komunikacionit rrugor në qytetin e Ferizajt.
Në një rast, më 11 janar 2025, rreth orës 19:00, policët e stacionit të Ferizajt identifikuan shoferin A.V, 74 vjeç, i cili kishte bërë një kthim gjysmërrethi në nënkalimin e rrugës “Ahmet Kaçiku”.
Ky veprim, i cili ishte regjistruar nga një qytetar dhe u shpërnda në rrjetet sociale, i solli shoferit një gjobë prej 100 eurosh.
Ndërkaq, rreth orës 21:10 të njëjtën ditë, policët e Njësisë së Komunikacionit Rrugor shqiptuar një gjobë prej 150 eurosh dhe një pikë negative për shoferin L.M, 27 vjeç, për shkak të një kundërvajtjeje në rrugën magjistrale Kaçanik-Shtërpcë, në fshatin Firajë.
Shoferi kishte shkaktuar rrëshqitje të gomave gjatë lëvizjes, duke rrezikuar sigurinë e pjesëmarrësve të tjerë në komunikacion. Ky rast gjithashtu u regjistrua nga një qytetar dhe u dërgua në adresën e policisë.
Policia rajonale e Ferizajt falënderon qytetarët për bashkëpunimin në identifikimin e kundërvajtjeve në komunikacion dhe i inkurajon ata që të vazhdojnë të bashkëpunojnë për sigurinë e të gjithë përdoruesve të rrugëve. Për çdo kundërvajtje, qytetarët mund të njoftojnë stacionet policore të afërta ose të përdorin aplikacionin “Lajmëro Policinë”, si dhe mund të kontaktojnë në numrat kujdestarë: 192, 0290/326-250 dhe 0290/322-406.
