Një i vdekur dhe një i lënduar nga një aksident në rrugën Lipjan - Shtime

Një aksident me fatalitet ka ndodhur sot rreth orës 12:45 në rrugën Lipjan – Shtime, saktësisht në afërsi të fshatit Grackë e vogël.

Nga informatat e para të Policisë, bëhet e ditur se në aksident janë përfshirë një kamion dhe dy vetura.

Policia ka konfirmuar për “Zërin” si pasojë e aksidentit, një person ka humbur jetën ndërkaq për shkak të lëndimeve të marra nga aksidenti një person është dërguar në QKUK për trajtimin e nevojshëm mjekësor.

“Për shkak të aksidentit janë krijuar vështirësi qarkullimi në segmentin rrugor Lipjan-Shtime-Topliqan - Bujan. Njësia rajonale e trafikut ka dalë në vendin e ngjarjes, ka ndërmarrë veprimet e nevojshme për lehtësimin e qarkullimit dhe ri drejtimin e trafikut, si dhe ka nisur një hetim lidhur me rrethanat e këtij aksidenti”, ka konfirmuar zëdhënësi i policisë për rajonin e Prishtinës, Agron Borovci. /Zëri