Lëndohen dy persona gjatë një gare automobilistike në Shtime

Dy persona janë lënduar lehtë gjatë një gare “Off Road” në Shtime, pas rrokullisjes së një veture.

Shoferi 35-vjeçar dhe pasagjeri 23-vjeçar, të dy shtetas të Maqedonisë së Veriut, kanë marrë ndihmë mjekësore në Qendrën e Mjekësisë Familjare në Shtime dhe më pas janë liruar.

Lajmin e ka bërë të ditur zëdhënësi i policisë për rajonin e Ferizajt, Kanun Veseli.

“Sot rreth orës 13:25 kemi pranuar një informatë se gjatë garës me vetura në garën ”Off Road” në Shtime, dy persona (shoferi 35 vjeç dhe pasagjeri 23 vjeç) meshkuj, shtetas të Republikës së Maqedonisë së Veriut kanë pësuar lëndime të lehta trupore, të cilët janë trajtuar në Qendrën e Mjekësisë Familjare në Shtime dhe janë liruar. Policia e stacionit në Shtime është duke trajtuar rastin”, tha Veseli.

Fatmirësisht, lëndimet janë raportuar të jenë të lehta dhe nuk ka pasur pasoja të tjera.

Gara e tipit “Off Road” në të cilën ndodhi incidenti tërhoqi vëmendjen për masat e sigurisë dhe organizimin.