Arrestohen tre persona në Ferizaj - një për vjedhje, dy të tjerë që penguan policinë ta arrestojë hajdutin

Mbrëmë rreth orës 19:00 Policia ka pranuar informatën se në rrugën “Dëshmorët e Kombit’’ në Ferizaj, në dy raste të ndara, në dy lokale ishin kryer vjedhje.

Policia sot ka njoftuar se menjëherë në vendin e ngjarjes kanë dalë ekipe të Policisë, policët e rendit dhe hetuesit e stacionit të Ferizajt, të cilët pas një pune intensive në terren, në bazë të shikimit të kamerave të sigurisë kanë identifikuar të dyshuarin E.D., i moshës 58-vjeçar, të cilin në një bodrum të një banese në rrugën “12 Qershori” në Ferizaj e kanë arrestuar, ndërsa janë arrestuar edhe dy persona të tjerë: E.N., i moshës 31-vjeçar dhe U.E., i moshës 42-vjeçar, të cilët kanë penguar zyrtarët policorë, derisa kanë arrestuar të dyshuarin E.D.

“Tre të dyshuarit janë shoqëruar në Stacionin e Policisë në Ferizaj dhe pas intervistimit të tyre nga hetuesit policor, me vendim të prokurorit të shtetit, personat: E.D. dhe E.N. janë ndaluar në mbajtje për 48 orë, ndërsa U.E. është liruar për procedurë të rregullt hetimore”, thuhet në njoftimin. /Zëri