Konfirmohet se i plagosuri dje në Fushë-Kosovë është zyrtar policor, ishte kalimtar rasti

Një person u plagos nga arma e zjarrit të dielën në Fushë-Kosovë.

Policia e Kosovës, përmes raportit 24-orësh, ka konfirmuar se i njëjti është zyrtar policor dhe në momentin e incidentit ka qenë jashtë detyrës si kalimtar rasti.

“Viktima mashkull kosovar, zyrtar policor jashtë detyrës si kalimtar rasti, është plagosur nga dy grupe që kishin mosmarrëveshje në mes vete. Viktima është dërguar për trajtim mjekësor në QKUK”, thuhet në raport.

Policia shton se lidhur me rastin janë intervistuar dy të dyshuar kosovarë, të cilët janë liruar në konsultim me prokurorin, ndërsa një i dyshuar tjetër është arratisur nga vendi i ngjarjes.

“Njësitet policore me urdhër të prokurorit kanë kryer bastisje në lidhje me rastin, por nuk kanë gjetur asgjë të dyshuar. Në konsultim me prokurorin, janë iniciuar veprat e cekura penale, ndërsa njësitet policore janë duke hetuar rastin”, thuhet tutje në raport.

Drejtori i Klinikës Emergjente në QKUK, Naser Syla, ka thënë se gjendja e tij është stabile.

“Është në gjendje stabile. Janë kryer ekzaminimet e nevojshme dhe jemi në pritje të rezultateve”, deklaroi Syla për mediat.