Bedri Krasniqi lirohet nga akuza për kanosje ndaj Shkumbin Mehmetit

Gjykata Themelore e Prishtinës e ka liruar Bedri Krasniqin nga akuza për kanosje ndaj Shkumbin Mehmetit.

Shpallja e aktgjykimit është bërë këtë të hënë nga gjykatësi i rastit, Sabit Sadikaj.

Sipas gjykatësit Sadikaj, nga provat materiale dhe personale nuk është vërtetuar se i njëjti ka kryer veprën penale siç është akuzuar.

Ndërkaq, shpenzimet e procedurës bie në barrë të buxhetit të gjykatës, si dhe pala e pakënaqur në afat prej 30 ditësh ka të drejtën në ushtrimin e ankesës pasi të pranojnë vendimin në formë të shkruar.

Me rastin e shpalljes së aktgjykimit i pranishëm nuk ishte prokurorja Ardiana Veseli, si dhe i akuzuari Bedri Krasniqi.

Ndryshe, Krasniqi më 13 shtator 2023 ishte liruar nga Themelorja për vrasjen e rëndë ndaj dy zyrtarëve të UNMIK-ut, mirëpo Prokuroria Speciale ka parashtruar ankesë ndaj vendimit dhe lënda është në Apel për trajtim.

Ndryshe, sipas aktakuzës së ngritur më 31 tetor 2019, më 18 prill 2019 në rrugën prej Burgut të Sigurisë së Lartë në Gërdoc të Podujevës, në drejtim të Prishtinës, tani i akuzuari Bedri Krasniqi me qëllim të frikësimit ose shkaktimit të ankthit, e ka kanosur me fjalë të dëmtuarin Shkumbim Mehmeti gjatë transportimit të tij për në Pallatin e Drejtësisë në Hajvali.

Tutje, në aktakuzë thuhet se pasi janë vendosur të dy në të njëjtin mjet transporti gjatë rrugës, i akuzuari Krasniqi ka komunikuar me të dëmtuarin Mehmeti para hyrjes në automjet dhe gjatë transportimit, duke e kanosur këtë të fundit me fjalët “qysh e ki familjen, e di se familjen e ki në Francë dhe se djali yt i ka bërë katër vite, po ashtu edhe vëllezërit tuaj punojnë me disa kabllo internet”, duke i bërë me dije të dëmtuarit për mundësinë e arritjes së qëllimeve ndaj tyre.

Në vazhdim sipas aktakuzës, i akuzuari ka thënë “Është më mirë të kujdesesh për familjen tënde, e mos të merresh me punë tjera”, duke aluduar në mosdëshmimin e tij ndaj të akuzuarit në çështjen penale të vrasjes së rëndë dhe thuhet se me këto fjalë i akuzuari e ka shqetësuar seriozisht të dëmtuarin se do ta privojë nga jeta ose që do t’i shkaktojë lëndim të rëndë trupor ndonjë anëtari të familjes.

Me këtë, Krasniqi po akuzohet se ka kryer veprën penale “Kanosja” nga Neni 181, par. 2 të Kodit Penal, ku kryerësi dënohet me gjobë ose me dënim deri në një vit. /BetimipërDrejtësi